Qoʻshimcha funksionallar
-
Tungi ko‘rinish
Dog‘istonda magistral gaz quvurida portlashlar yuz berdi
Rossiyaning Dog‘iston Respublikasida joylashgan Qizilyurt shahri yaqinida magistral gaz quvurida ketma-ket uchta portlash sodir bo‘ldi. Hodisa ortidan yirik yong‘in kelib chiqqan bo‘lib, xavfsizlik maqsadida 140 nafardan ortiq aholi evakuatsiya qilindi.
Hodisa 9 iyun kuni «Gazprom transgaz Maxachkala» kompaniyasiga qarashli «Mozdok – Qozimagomed» magistral gaz quvurida sodir bo‘lgan.
Dog‘iston Favqulodda vaziyatlar boshqarmasi ma’lumotiga ko‘ra, avariyaga Qizilyurt tumanidagi Bavtug‘ay va Gelbax aholi punktlari oralig‘ida quvurning germetikligi buzilishi sabab bo‘lgan.
Portlashlardan keyin kelib chiqqan yong‘in juda kuchli bo‘lib, alanga balandligi 15 metrgacha yetgan.
140 nafar aholi evakuatsiya qilindi
Favqulodda xizmatlar yong‘inni bartaraf etish uchun ikki soatdan ortiq vaqt davomida ish olib borgan.
Mahalliy hokimiyat ma’lumotlariga ko‘ra, xavfsizlik chorasi sifatida Qizilyurt tumanida yashovchi qariyb 140 nafar fuqaro evakuatsiya qilinib, vaqtincha qarindoshlari uylariga joylashtirilgan.
Rasmiylar hodisa oqibatida halok bo‘lganlar yoki jabrlanganlar yo‘qligini ma’lum qildi.
Gaz ta’minoti vaqtincha to‘xtatiladi
Portlash va yong‘in oqibatlarini bartaraf etish ishlari munosabati bilan Qizilyurt shahri, shuningdek, Qizilyurt va Kumtorqalin tumanlaridagi bir qator aholi punktlarida gaz ta’minoti vaqtincha to‘xtatilishi bildirildi.
FVV ma’lumotiga ko‘ra, «Gazprom transgaz Maxachkala» dispetcherlik xizmati hududda uch kunlik gaz zaxirasi mavjudligini ma’lum qilgan.
Quvur strategik ahamiyatga ega
«Mozdok – Qozimagomed» magistral gaz quvuri Dog‘istonning qator tumanlarini tabiiy gaz bilan ta’minlaydi. Shuningdek, mazkur quvur Rossiyadan janubiy yo‘nalishga, jumladan Ozarbayjonga tabiiy gaz yetkazib berish tizimining muhim qismi hisoblanadi.
Hozirda hodisa sabablari bo‘yicha tekshiruv ishlari olib borilmoqda.
