O‘zbekistonda talabalar soni 1,5 milliondan oshdi

2025-2026 o‘quv yili boshida O‘zbekistondagi oliy ta’lim muassasalarida tahsil olayotgan talabalar soni 1 million 535 ming nafarga yetdi. Bu mamlakat oliy ta’lim tizimi tarixidagi eng yuqori ko‘rsatkichlardan biri bo‘lib, bir yil ichida talabalar soni 102 ming nafardan ziyodga oshgan.

Foto: TAQU

Milliy statistika qo‘mitasi ma’lumotlariga ko‘ra, joriy o‘quv yili boshida oliy ta’lim tashkilotlarida tahsil olayotgan talabalar soni o‘tgan o‘quv yiliga nisbatan 102,2 ming nafarga yoki 7,1 foizga ko‘paygan.

Jami talabalarning 782,9 ming nafarini ayollar, 752,1 ming nafarini esa erkaklar tashkil etgan. Shu tariqa, oliy ta’limda ayollar ulushi erkaklarga nisbatan yuqoriroq bo‘lib qolmoqda.

So‘nggi yillarda talabalar soni izchil o‘sish tendensiyasini namoyon etmoqda. Xususan, 2021-2022 o‘quv yilida mamlakatda 808,4 ming nafar talaba tahsil olgan bo‘lsa, 2022-2023 o‘quv yilida bu ko‘rsatkich 1 million 42,1 ming nafarga yetgan.

2023-2024 o‘quv yilida talabalar soni 1 million 314,5 ming nafarni, 2024-2025 o‘quv yilida esa 1 million 432,8 ming nafarni tashkil etgan. Joriy o‘quv yilida mazkur raqam ilk bor 1,5 millionlik marradan oshdi.

Mutaxassislar bu o‘sishni mamlakatda oliy ta’lim qamrovining kengayishi, yangi universitet va filiallar tashkil etilishi hamda qabul kvotalarining oshirilishi bilan izohlamoqda.

Shuningdek, statistika ma’lumotlari oliy ta’lim sohasida ayollar faolligi ortib borayotganini ham ko‘rsatmoqda.