G‘arb razvedkasi SI kiberhujumlarining yangi tahdidi haqida ogohlantirdi

22 iyun kuni e’lon qilingan bayonotda alyans sun’iy intellekt modellari yaqin vaqt ichida «joriy sanoat kutilmalaridan oshib ketishi» va kiberxavfsizlik sohasidagi vaziyatni tubdan o‘zgartirishi haqida ogohlantiradi. Yangi sun’iy intellekt modellari, bir tomondan, kiberhimoyani yaxshilashga yordam beradi, ammo bir vaqtning o‘zida «kibertahdidlarning tezligi, ko‘lami va maqsadliligini oshiradi».

«Muddati yillar emas, oylar», deb yozdi murojaat mualliflari, ehtimoliy tahdid «barcha tashkilotlar va butun jamiyatning javobini» talab qilishini ta’kidlab.

G‘arb razvedka xizmatlarining ta’kidlashicha, kiberxavfsizlik bilan bog‘liq xavf-xatarlar endi «sof texnik muammo» sifatida emas, balki biznes uchun asosiy xavf va rahbariyatning mas’uliyat sohasi sifatida qaralishi kerak.

The Guardian nashrining ta’kidlashicha, «Besh ko‘z» alyansi a’zolari kamdan-kam hollarda ochiq murojaatlar bilan chiqadi va ommaviy bo‘lmagan harakatlarni afzal ko‘radi.

Alyans bayonotida aniq sun’iy intellekt modellari tilga olinmagan bo‘lsa-da, The Guardian va boshqa ommaviy axborot vositalari iyun oyi boshida AQSh hukumati Anthropic kompaniyasini o‘zining eng kuchli Fable 5 va Mythos 5 sun’iy intellekt modellariga xorijiy foydalanuvchilarning kirishini to‘xtatishga majbur qilganini eslatmoqda.

Anthropic bu talabga rozi bo‘lmasa-da, unga bo‘ysunishini aytdi. Shu bilan birga, kompaniya deyarli barcha foydalanuvchilar uchun ushbu sun’iy intellekt modellarini o‘chirib qo‘ydi, chunki fuqarolikni onlayn tasdiqlash imkonsiz.