Ғарб разведкаси СИ киберҳужумларининг янги таҳдиди ҳақида огоҳлантирди

22 июнь куни эълон қилинган баёнотда альянс сунъий интеллект моделлари яқин вақт ичида «жорий саноат кутилмаларидан ошиб кетиши» ва киберхавфсизлик соҳасидаги вазиятни тубдан ўзгартириши ҳақида огоҳлантиради. Янги сунъий интеллект моделлари, бир томондан, киберҳимояни яхшилашга ёрдам беради, аммо бир вақтнинг ўзида «кибертаҳдидларнинг тезлиги, кўлами ва мақсадлилигини оширади».

«Муддати йиллар эмас, ойлар», деб ёзди мурожаат муаллифлари, эҳтимолий таҳдид «барча ташкилотлар ва бутун жамиятнинг жавобини» талаб қилишини таъкидлаб.

Ғарб разведка хизматларининг таъкидлашича, киберхавфсизлик билан боғлиқ хавф-хатарлар энди «соф техник муаммо» сифатида эмас, балки бизнес учун асосий хавф ва раҳбариятнинг масъулият соҳаси сифатида қаралиши керак.

The Guardian нашрининг таъкидлашича, «Беш кўз» альянси аъзолари камдан-кам ҳолларда очиқ мурожаатлар билан чиқади ва оммавий бўлмаган ҳаракатларни афзал кўради.

Альянс баёнотида аниқ сунъий интеллект моделлари тилга олинмаган бўлса-да, The Guardian ва бошқа оммавий ахборот воситалари июнь ойи бошида АҚШ ҳукумати Anthropic компаниясини ўзининг энг кучли Fable 5 ва Mythos 5 сунъий интеллект моделларига хорижий фойдаланувчиларнинг киришини тўхтатишга мажбур қилганини эслатмоқда.

Anthropic бу талабга рози бўлмаса-да, унга бўйсунишини айтди. Шу билан бирга, компания деярли барча фойдаланувчилар учун ушбу сунъий интеллект моделларини ўчириб қўйди, чунки фуқароликни онлайн тасдиқлаш имконсиз.