Qoʻshimcha funksionallar
-
Tungi ko‘rinish
Hafta davomida issiq kuchayishi kutilmoqda
Kunduzgi harorat +41…+44 darajagacha ko‘tariladi. Kechalari esa havo dim bo‘lib, +23…+33 daraja atrofida bo‘ladi. Ayrim joylarda chang-to‘zonlar kuzatilishi mumkin.
Ish haftasi oxirigacha issiq asta-sekin kuchayib boradi, deya xabar bermoqda O‘zgidromet.
Dushanba kunduzi O‘zbekiston bo‘yicha issiq va asosan quruq ob-havo bo‘lishi kutilmoqda, faqat Farg‘ona vodiysida ayrim joylarda kunning ikkinchi yarmida qisqa muddatli yomg‘ir yog‘ishi, momaqaldiroq bo‘lishi mumkin. Hududning katta qismida havo harorati +38…+41 daraja atrofida, shimolda, janubda va cho‘l hududlarda +42…+44 darajagacha bo‘ladi.
Hafta davomida kunduzgi havo harorati +41…+43 darajagacha, shimolda, janubda va cho‘l hududlarda +42…+44 darajagacha ko‘tariladi. Kechalari havo dim bo‘lib, +23…+28 daraja, shimolda, janubda va cho‘l hududlarda +28…+33 daraja atrofida bo‘ladi.
Shamol sharqdan 7–12 metr/soniya tezlikda esadi, ba’zi joylarda 13–18 metr/soniyagacha kuchayishi, ayrim joylarda chang-to‘zonlar bilan kuzatilishi mumkin.
13–14 iyul kunlari ayrim tog‘li hududlarda qisqa muddatli yomg‘ir yog‘ishi, momaqaldiroq bo‘lishi mumkin. 13 iyulda Toshkent, Andijon, Namangan, Farg‘ona vodiysida tog‘oldi va tog‘li hududlarda sel-suv toshqin hodisalari yuzaga kelishi mumkin.
Toshkent shahrida kam bulutli ob-havo kuzatiladi. Dushanba va seshanba kunduzgi havo harorati +38…+40 daraja, 15–17 iyulda +40…+43 daraja, kechalari esa +25…+28 daraja bo‘ladi.
