Ukraina hech qachon okkupatsiyaga rozi bo‘lmasligi lozim – Aliyev

Ozarboyjon prezidenti Ilhom Aliyev Ukraina xalqiga o‘z hududlari okkupatsiya qilinishiga hech qachon rozi bo‘lmaslikni maslahat berdi. Shushadagi mediaforumda ukrainalik jurnalist Dmitriy Gordon undan Ukrainaga hamda Putinga qanday maslahatlar berishi haqida so‘ragan.

«Ukrain xalqi ham, Ukraina hukumati ham mening maslahatimga muhtoj emas, deb o‘ylayman. Ammo men yana bir bor takrorlamoqchiman: hech qachon okkupatsiyaga rozi bo‘lmang. Va Ukraina ham shunday qilmoqda. U okkupatsiyaga rozi emas.

Yil davomida murakkab pallalar bo‘ldi, ma’lum doiralarning okkupatsiyani mustahkamlashga qaratilgan bosimiga guvoh bo‘ldik, bu haqda eshitdik. Ammo Ukraina xalqi ham, uning rahbarlari ham bunga rozi bo‘lmadi», – degan Aliyev.

Shundan keyin u savolning ikkinchi qismiga o‘tgan.

«Qarshi tomonga maslahat berishga kelsak, mendan so‘rashsa, albatta, maslahat beraman. Ammo hozir, o‘ylaymanki, sizning savolingiz doirasida bunday maslahat berish unchalik to‘g‘ri bo‘lmaydi.

Lekin vaziyatni va harbiy harakatlarni davom ettirish istiqbollari bo‘yicha munosabatimga kelsak, menimcha, u siznikidan unchalik farq qilmaydi. O‘ylaymanki, allaqachon bu urush to‘xtatilishi kerakligini tushunish kerak edi... Bu Ozarbayjonning pozitsiyasi, mening pozitsiyam, sof insoniy pozitsiyam. Okkupatsiya qilingan va okkupatsiyadan ozod bo‘lgan mamlakatni boshqargan va boshqarayotgan odamning pozitsiyasi. Menimcha, bunday tajriba tarixda juda kam uchraydi, chunki bu tajribada ham okkupatsiya, ham qo‘pol qilib aytganda, Qorabog‘ni berishga rozi bo‘lishga majburlashga urinish bor.

...lekin bu maqsadga erishilmadi, chunki xalq irodasini sindirib bo‘lmaydi. Mustaqillikka, o‘zligini saqlab qolishga intilayotgan xalqni yengib bo‘lmaydi, qul qilib bo‘lmaydi, majburlab bo‘lmaydi. Bugungi kunda ham harbiy harakatlarni davom ettirish tarafdori bo‘lganlar bu tushunchani anglab yetishi kerak», – degan Aliyev.

U Ozarboyjon doim Ukrainaning hududiy yaxlitligini, uning suverenitetini, chegaralarining daxlsizligini qo‘llab-quvvatlagani, bu pozitsiya hozir ham o‘zgarmagani va bundan keyin ham o‘zgarmasligini ta’kidlagan.

«Prezident Zelenskiyning pozitsiyasi menga ma’lum, aprel oyidagi tashrif vaqtida biz u bilan bu mavzuda batafsil suhbatlashdik. Uning pozitsiyasi – harbiy harakatlarni to‘qnashuv chizig‘ida darhol to‘xtatish. Bu taklif qay darajada dolzarb ekanini bilmayman, lekin har holda u pozitsiyasini o‘zgartirganini aytmagan.

Shuning uchun o‘ylaymanki, har qanday holatda ham Ozarboyjonning pozitsiyasi o‘zgarmasdir. Biz har doim Ukrainaning hududiy yaxlitligini, uning suverenitetini, chegaralarining daxlsizligini qo‘llab-quvvatlaganmiz, qo‘llab-quvvatlayapmiz va bundan keyin ham qo‘llab-quvvatlaymiz.

Biror davlatning chegaralari zo‘rlik bilan yoki shu mamlakat xalqining roziligisiz o‘zgartirilishi mumkin emas. Bu borada ham, tabiiyki, bizning pozitsiyalarimiz yetarlicha izchil va qat’iy.

Ukraina xalqiga esa qo‘limizdan kelgancha yordam berishga doim tayyormiz. Men bu mavzuda ko‘p gapirishni xohlamayman. Biz buni gapirish uchun qilmayapmiz. Bu (yordam) ham shunchaki chin yurakdan bo‘lyapti. Davlatning ham, shunchaki oddiy odamlarning ham, tijorat kompaniyalarining ham. Ya’ni, bu qiyin ahvolda qolgan, jabr ko‘rgan, hududiy yaxlitligi buzilganlarga qo‘limizdan kelgancha yordam berish uchun yakdil intilishdir», – degan Ozarboyjon rahbari.

RF prezidenti matbuot kotibi Dmitriy Peskov Kremldagilar Ozarboyjon prezidentining Ukrainadagi mojaro bo‘yicha pozitsiyasini noto‘g‘ri deb hisoblashini aytdi. Shu bilan birga, u bu ikki tomonlama munosabatlarga soya solish uchun sabab emasligini ta’kidladi.

«Prezident Aliyev tomonidan bildirilgan pozitsiyaga kelsak, biz bilan yaqin munosabatlarda bo‘lgan, lekin biz qat’iyan qarshi bo‘lgan shunday pozitsiyada turadigan qator davlatlar bor. Ha, bu o‘zaro kelishmovchiliklar mavzusi hisoblanadi. Shu bilan birga, bu masala ikki tomonlama munosabatlarimizga soya solishi uchun sabab emas, deb hisoblaymiz», – dedi Peskov.

U Moskva pragmatik yondashuvni qo‘llab-quvvatlashi va Ukraina bo‘yicha o‘z pozitsiyasini izchil va asosli ravishda tushuntirgan holda Ozarboyjon bilan munosabatlarni har tomonlama rivojlantirish niyatida ekanini qo‘shimcha qilgan.