Кобулдаги француз ресторанида террорчи ўзини портлатиб юборди

1 январь куни Афғонистон пойтахти Кобул шаҳридаги Le Jardin номли французлар ресторани олдида террорчи-ҳудкуш миниб келган автомобил портлаши туфайли 12 ёшли бола ҳалок бўлиб, 15 киши жароҳатланди. CNN телеканали хабарига кўра портлаш туфайли ресторан биносида ёнғин чиққан.

Fox News телеканали эса портлашдан кейин отишма овозлари эшитилганини айтган.

Воқеа жойига ҳуқуқ-тартибот органлари, ўт ўчириш хизматлари ва тиббиёт ходимлари етиб келишган. Шифокорлар жароҳат олганларни госпиталларга олиб кетишган.

Қайд этилишича, бу ресторан Афғонистондаги хорижликлар кўп тўпланадиган бинолардан бири бўлиб, у ерга маҳаллий амалдорлар ҳам тез-тез ташриф буюришади.

Бу теракт учун жавобгарликни "Толибон" ташкилоти ўз зиммасига олган. Бу ташкилот вакили Забиулло Мужоҳид қанча хорижлик ўлдирилгани ҳақидаги маълумотга эгалиги ҳақида айтган.

Мамлакат президенти Ашраф Ғани бу терактни қоралаб чиққан ва уни "кечириб бўлмас ҳаракат" сифатида баҳолаган.

2015 йилнинг декабрь ойи охирида Кобулдаги аэропортда ҳам портлаш амалга оширилиши туфайли 1 киши ҳалок бўлган ва 33 киши жароҳатланганди.

21 декабрь куни АҚШнинг Багромдаги авиабазаси яқинида террорчи ўзини портлатишидан кейин 6 нафар америкалик ҳарбий хизматчи ҳалок бўлганди.

11 декабрь куни жангарилар Кобулдаги Испания элчихонасига ҳужум қилишган, бу ҳужумни бартараф этиш учун бир неча соат давомида жанг олиб борилганди. Бу ҳужум натижасида испаниялик зобитлардан бири ва 5 нафар афғонистонлик ҳарбий ҳалок бўлган, жангариларнинг йўқотиши эса 3 кишини ташкил этганди.