70 миллион сўмлик тарихий тангаларни олиб ўтмоқчи бўлган жиноятчилар ҳаракатига нуқта қўйилди

Термиз аэропортида ҳам божхоначилар 26 дона тарихий тангаларнинг яширин равишда олиб чиқилишини бартараф этишди. Ушбу вилоятда истиқомат қилувчи фуқаро Москвага йўл олар экан, ўзи билан степлер – канцелярия буюмини ҳам олиб кетаётганлиги бир қарашда шубҳали туюлиши, табиий! Ушбу шахсга тегишли юкларни назорат-рентген аппратидан ўтказиш вақтида, степлер тасвирининг экранда шубҳали акс этиши божхоначиларни ушбу матоҳни синчиклаб текширишга ундади.  

Натижада, степлер ичига турли тасвирлар туширилган ва ҳар хил ҳажмдаги 26 дона қадимий тангалар яширилганлиги аниқланди. Сурхондарё вилояти бадиий экспертизаси хулосасига кўра, мазкур мис ва кумушдан ишланган тангалар тарихда юртимиз ҳудудида вужудга келган Кушон, Юнон-Бақтрия, Қорахонийлар,  Араб халифалиги ва Бухоро хонлиги давлатларида муомалада бўлган. Уларнинг бугунги кундаги қиймати экспертлар томонидан 70 млн. сўмга баҳоланган.

Ҳозирда мазкур ҳолат юзасидан божхона текширувлари ва суриштирув жараёнлари давом этмоқда.