Путин 40 минг рублгача бўлган валюта айирбошлаш тўғрисидаги янги қонунни имзолади

Россия президенти Владимир Путин фуқароларга 40 минг рублгача бўлган миқдордаги хорижий валютани паспортсиз айирбошлаш имконини берувчи қонунни имзолади. Ҳужжат ҳуқуқий ахборот расмий порталида чоп этилган. 

Мазкур қонун 15 июнь куни Давлат думаси томонидан қабул қилинган ҳамда 29 июнда Федерация Кенгаши томонидан тасдиқланган. 

Янги қонун валюта айирбошлаш операцияларининг пул миқдорини 15 мингдан 40 минг рублгача кўтаради. Бунда мижознинг шахсини тасдиқлаш талаб қилинмайди ва бунда фуқаролар томонидан паспорт кўрсатилмайди. Шу тариқа, мижознинг шахсини тасдиқлашни талаб қилувчи сумма миқдори деярли уч баробар ошади. 

Валютани сотиш ёки сотиб олиш бўйича операциялар амалга оширилганда, мижознинг шахсини осон аниқлаш учун кўзланган пул қиймати қонунан 40 минг рублдан 100 минг рублгача оширилади, бунда улар паспортнинг ўзини кўрсатишса, кифоя.  

Қонун операцион юкни ҳамда хорижий валютани айирбошлаш операцияларини расмийлаштиришда банкларнинг харажатини камайтириш мақсадида ишлаб чиқилган.

Мазкур қонун унинг расман эълон қилинган кунидан бошлаб кучга киради.