Британия ритейлери Google’нинг янги смартфонларини тақдим этишидан олдин намойиш этди

3 октябрь куни Британиянинг Carphone Warehouse дўкони ўз расмий сайтида Google Pixel ва Pixel XL смартфонларининг суратлари ва техник хусусиятларини жойлаштирди. Лекин Google бу смартфонларни кейинги кунда бошқа янги қурилмалар билан бир қаторда ўз тақдимотида намойиш этиши керак эди. Бу ҳақида Engadget нашри хабар берди.

Катта эътибор Google’нинг ўз хизматларига қаратилган. Ритейлернинг суратларида Allo мессенжери ва Duo видеочатининг имкониятлари ҳақида маълумот акс эттирилган. Google Photos ҳақида алоҳида тўхталиб ўтилган: янги смартфонлар учун чексиз сондаги фотосуратларни серверларда сақлаш имкони берилади. Сайтда айтилишича, "тез қувват" олиш функцияси ёрдамида 15 дақиқа қувватланишдан сўнг телефон 7 соат ишлай олади. Смартфонлар оқ ва қора рангда тақдим этилган бўлиб, бир-биридан баъзи хусусиятлари билан фарқланади. Янги қурилмалар 4 ядроли Snapdragon 821 процессорида ишлайди ва 4 ГБ оператив хотирага эга бўлади. Кичикроқ моделга 2770 мА·с ва катта моделга эса — 3450 мА·с сиғимдаги аккумуляторлар жойлаштирилади.

Танловга асосан ўрнатилган хотира 32 ёки 128 ГБ бўлади, аммо уни 256 ГБ гача бўлган SD-хотира ёрдамида кенгайтириш мумкин. Лекин Android Police нашрининг фикрига кўра, ритейлер томонидан қўшимча хотира ҳақида берилган бу маълумот хато ҳисобланади.

Google Pixel 5 дюймли экран (1920 га 1080 нуқта) ва Gorilla Glass 4 ҳимоя шишасига эга бўлиб, Google Pixel XL нинг дисплейи эса 5,5 дюймни ташкил этади. Смартфонларда Google нинг охирги дастурий таъминоти — Android Nougat 7.1 ўрнатилган бўлади. Ҳар бир моделга 12 Мп ва 8 Мп бўлган олд ва орқа камералари жойлаштирилган.