Винни-Пух — 90 ёшда

1926 йилнинг 14 октябрида Лондонда британиялик ёзувчи Алан Милннинг Кристофер Робин исмли болакай, айиқ, Пятачок ва Ажойиб ўрмонда яшовчи бошқа жониворлар ҳақидаги китоби нашрдан чиқди. Ушбу китобнинг бош қаҳрамони Винни-Пух номини олган бўлиб, у бироз эртароқ - Милн ўзининг 4 ёшли ўғлини (Кристофер Робин) ҳайвонот боғига олиб келган ва унга Виннипег исмли айиқни (Биринчи жаҳон уруши йилларида Англияга Канада ветеринар корпуси рамзи сифатида келган) кўрсатган маҳал яратилган. Болага ота-онаси томонидан совға қилинган юмшоқ ўйинчоқ ана шу айиқ шарафига номланган; Милн ўғли учун шу айиқ ҳақида турли ҳикоялар ёзарди. Винни-Пух ва унинг дўстлари ҳақида жами икки китоб чоп этилган - уларда болалар ётоқхонасидаги олам уй атрофидаги олам билан уйғунлаштириб берилган, ўйинчоқлар эса ҳатто Кристофер йўқлигида ҳам ўз шахсий ҳаётини яшайди. Кейинчалик, 1960 йилларда "Дисней" компанияси Милн персонажларининг китобдаги сюжетларга асосланган саёҳатлари ҳақида анимацион фильм ярата бошлади, бундай мультфильмлар ҳануз эфирга узатилмоқда. МДҲ давлатларида Винни-Пух Борис Заходер таржимаси ва Фёдр Хитрукнинг уч мультфильми туфайли машҳурликка эришди - ҳали-ҳануз мультфильмнинг қайси версияси ("Дисней" ёки Евгений Леонов овоз берган "Союмультфильм" версияси) яхшироқ эканлиги борасидаги баҳслар тинмайди.