Ироқ президенти спиртли ичимликлар сотиш ҳақидаги қонунни қайта кўриб чиқишга чақирди

Фото: RIA

Ироқ президенти Фуад Масум мамлакат парламентини маҳаллий савдо ҳақидаги қонунни қайта кўриб чиқишга чақирди. Қонунга бевосита овоз беришдан олдин Ироқ бўйлаб спиртли ичимлик ишлаб чиқариш ва сотишни тақиқлаш банди киритилган. Бу ҳақда РИА “Новости” ахборот агентлиги хабар бермоқда.

Масумнинг айтишича, қонун юзасидан "турли дин ва диний таълимотлар фуқароларининг эркинликлари ва ҳуқуқларини ҳурмат қилган ҳолда" янги овоз бериш ўтказиш лозим.

Унинг таъкидлашича, банднинг бевосита овоз беришдан аввал, ҳеч қандай қўшимча муҳокамасиз киритилишига йўл қўйиб бўлмайди ва бу Ироқ депутатларининг аввалги услубларига ўхшамайди.

Парламент томонидан тўсатдан қабул қилинган спиртли ичимликларга тақиқлов Ироқ жамиятида муҳокамалар нишонига айланди. Қонунга қарши чиқувчилар мусулмон бўлмаган фуқароларнинг Ироқ конституцияси томонидан мустаҳкамланган ҳуқуқлари таҳқирланаётганини, тарафдорлари эса конституция бундай тақиқловни оқлашини айтишган.

Тайёрлаган: Шуҳрат Раҳимов

#Ироқ #спиртли ичимликларга тақиқлов