Ироқда ўғирлаб кетилган америкалик журналист Шелли Киттлсон озод қилинди

«Катаиб Ҳизбуллоҳ» гуруҳи бир неча маҳбусларнинг озод қилиниши эвазига уни қўйиб юборгани айтилмоқда.

Фото: AFP/Getty Images

Ироқда «Катаиб Ҳизбуллоҳ» гуруҳи томонидан ўғирлаб кетилган америкалик журналист Шелли Киттлсон озод қилинди, деб ёзди The New York Times гуруҳ вакиллари ва Ироқ хавфсизлик хизматидаги икки манбага таяниб.

Нашр маълумотларига кўра, Киттлсон «Катаиб Ҳизбуллоҳ»нинг бир неча маҳбус аъзоларини озод қилиш эвазига қўйиб юборилган. Гуруҳдан озод қилинганларнинг аниқ сони айтилмаган.

«Катаиб Ҳизбуллоҳ» журналистнинг зудлик билан Ироқни тарк этиши кераклигини айтди. Киттлсон ҳозир қаерда эканлиги номаълум.

Америкалик мустақил журналист Шелли Киттлсон 31 март куни Ироқ пойтахтида фуқаролик кийимидаги шахслар томонидан ўғирлаб кетилганди. У Яқин Шарқдаги бир қанча урушларни ёритган ҳамда хорижий нашрлар учун материаллар тайёрлаб келган.