Зимбабве ўз қоғоз пулларини муомалага чиқарди

Фото: Reuters

Зимбабве ҳукумати хорижий валюта етишмаётгани сабабли 2009 йилдан бери биринчи марта ўз қоғоз пулларини муомалага чиқарди. Бу ҳақда Reuters ахборот агентлиги хабар бермоқда.

Маълум бўлишича, Зимбабве Захира банкининг қоғоз пуллари қиймати АҚШ доллариникига тенглаштирилди. Чиқарилган пулларнинг умумий ҳажми 10 млн долларни ташкил қилди.

Маълум қилинишича, мамлакатда АҚШ доллари 2009 йилда мамлакатни гиперинфляция қамраб олгандан кейин ишлатила бошланган. Шундан кейин мамлакатда доллардан ташқари бошқа хорижий валюталар, жумладан ЮАР ранди ва Хитой юани ҳам муомалада бўлган.

Аввалроқ Зимбабвенинг АҚШ долларидан ўз валютасига қайтиши фуқаролар томонидан салбий муносабатга учрагани маълум қилинганди.