Рафаэль Некталов: “Сайловда кўрсатилган номзодлар Ислом Каримов яратиб кетган йўлни давом эттиришига ишонаман”

Фото: Qalampir.uz

“The Bukharian Times” газетаси бош муҳаррири Рафаэл Некталов эришилган ютуқларда Ўзбекистоннинг биринчи Президенти Ислом Абдуғаниевич Каримов меҳнати ётганини алоҳида эътироф этди.

30 ноябрдан расман ўз фаолиятини бошлаган “PRESS-CLUB: ELECTIONS.UZ-2016” матбуот клубида халқаро ОАВ вакиллари ҳам фаол иштирок этмоқда. Шу билан бирга, кузатувчи сифатида сайлов жараёнларини баҳолашда ҳам ўз ҳиссасини қўшади.

Жумладан, “The Bukharian Times” ҳафталик газетаси жамоаси ҳам Президент сайловини ёритиш ишларида фаол иштирок этмоқда.

“Агар Ўзбекистондаги сайлов жараёни ҳақида гапирадиган бўлсам, бир нарсани айтишим мумкин: Ўзбекистонда бугунги кунда кўппартияли тизим ҳаётда яққол ўз ифодасини топяпти ва жуда жиддий эътибор қаратилмоқда”, дейди “The Bukharian Times” газетаси бош муҳаррири Рафаэль Некталов.

Бош муҳаррир “Ўзбекистон Президентлигига номзодлар ўз сайловолди дастурида жуда муҳим масалаларга эътибор қаратган ва ҳар бири ғолиблик учун очиқ, ошкора ва адолатли кураш олиб бормоқда. Бунга кузатувларим жараёнида гувоҳ бўлдим. Сайловга номзодларнинг бундай ёндашуви эса ишончни оширади”, деган ҳолда Ўзбекистондаги сайлов ўтказиш тажрибасини юқори баҳолади.

“The Bukharian Times” газетаси бош муҳаррири Рафаэль Некталов Ўзбекистон ҳақида қуйидагича фикрларини билдирди:

“Ўзбекистон ўзининг тинчлик ва осойишталиги билан фахрланса бўлади. Бугунги кунда дунёдаги таҳликали вазиятдан қанча болалар, қанчадан қанча кексалар азият чекаётган бир пайтда юртингиздаги тинчлик алоҳида эътироф этиладиган жиҳат ҳисобланади, деб ўйлайман.

Ўзбекистон бўйлаб сафарларим чоғида гувоҳ бўляпманки, юртингизда қанча ижобий ўзгаришлар юз берган. Албатта бундай ютуқлар замирида Ўзбекистоннинг биринчи Президенти Ислом Абдуғаниевич Каримовнинг (жойлари жаннатда бўлсин) меҳнати ётганини алоҳида эътироф этиш зарур. Биринчи Президент яратиб кетган мана шундай йўлни ўйлайманки, 4 декабр куни бўлиб ўтадиган муҳим сиёсий жараён — Ўзбекистон Республикаси Президентлиги сайловига қўйилган номзодларнинг ҳар бири катта потенциал билан давом эттиради”.

Мухторбек Абдуллаев

#сайлов #The Bukharian Times #Рафаэль Некталов