Италияда конституцион ислоҳот бўйича референдумдан сўнг овозларни ҳисоблаш жараёни якунланди

Италиядаги референдум натижалари конституцион ислоҳотга қарши бўлганлар 20 фоиз овоз фарқи билан ғалаба қозонганлигини кўрсатди. 

Якшанба куни ўтказилган конституцион референдум Италияда Маттео Ренци ҳукумати томонидан 2014 йилда таклиф этилган конституцион ислоҳот билан боғлиқ эди. Ҳукумат қонун лойиҳаси Республика Сенатининг Италия давлат ҳукумати органлари тизимидаги вазифа ва ўрнини ўзгартиришни мақсад қилган. У миллий парламентда икки йил кўздан кечирилиб, 12 апрель куни якуний тасдиқдан ўтди. Парламент томонидан тасдиқланган ислоҳот Конституцияни қайта кўриб чиқишни ўз ичига олган бўлиб, у референдумга чиқарилиши лозим эди.

Италия ИИВ маълумотларига кўра, “йўқ” жавоби сайловчиларнинг 59,11 фоиз овозини олган бўлса, “ҳа” жавобига 40,89 фоиз кишилар ўз овозини берди. Мамлакат ҳудуди ва унинг ташқарисидаги референдумда иштирок этганлар миқдори 65,47 фоизни ташкил қилди.

Референдум натижалари билан ўзининг сиёсий тақдирини боғлаган Ренци мағлубият учун барча масъулиятни ўз бўйнига олди ва сешанба куни Италия президенти Серджо Маттареллега истеъфога чиқиш ҳақида мурожаат қилишини маълум қилди.