Андижон вилояти Ички ишлар бошқармасининг сайёр ва виртуал қабулхонаси ишга тушди

Андижон вилояти Ички ишлар бошқармасининг www.andijoniib.uz электрон манзилида расмий веб-саҳифаси очилди. Веб саҳифада Бошқарма бошлиғининг виртуал қабулхонаси ҳам ўз фаолиятини бошлади. Эндиликда жисмоний ва юридик шахслар мазкур виртуал қабулхона орқали ички ишлар органлари ва соҳа билан боғлиқ муаммолар ҳусусида ариза, мурожаат, таклиф ва тавсияларини электрон шаклда йўллаш имкониятига эга бўлдилар.

Шунингдек, мазкур расмий веб-саҳифада Ички ишлар бошқармаси раҳбариятининг қабул жадваллари, “Ишонч телефонлари” рўйхати, шахсий таркиб ўртасида ўтказилган маданий-маърифий тадбирлар ёритиб борилади.

Шунингдек, Ўзбекистон Республикаси Президентининг 2016 йил 28 декабрь кунги “Жисмоний ва юридик шахсларнинг мурожаатлари билан ишлаш тизимини тубдан такомиллаштиришга доир чора-тадбирлар тўғрисида”ги Фармони ижросини таъминлаш мақсадида Андижон вилояти Ички ишлар бошқармасининг сайёр қабулхонаси ташкил этилди. Сайёр қабулхона самарали фаолият кўрсатиши учун бир дона янги Isuzu русумли автобус махсус жиҳозланди.