Абдулазиз Комилов Кувайт бош вазири билан учрашди

Расмий ташриф билан Кувайтга етиб борган Ўзбекистон ташқи ишлар вазири Абдулазиз Комилов бошчилигидаги Ўзбекистон делегацияси 8 февраль куни Кувайт бош вазири шайх Жобир ал-Муборак ал-Ҳамад ас-Сабоҳ қабулида бўлди. 

ТИВ раҳбари Кувайт раҳбариятига Ўзбекистон Президенти Шавкат Мирзиёев йўллаган салом ва самимий тилакларни етказди.

ТИВ матбуот хизмати берган хабарда қайд этилишича, суҳбат чоғида икки томонлама муносабатларнинг, аввало, савдо-иқтисодий, инвестицион соҳалардаги алоқаларнинг ҳолати ва уларни янада ривожлантириш истиқболлари муҳокама қилинди.

Музокараларда томонларни қизиқтирган бошқа икки томонлама ва халқаро масалалар юзасидан ҳам фикр алмашилди.

Ташриф давомида Ўзбекистон делегацияси Ўзбекистон—Кувайт бизнес-форуми ва бошқа қўшма тадбирларда ҳам иштирок этиши белгиланган.