Гватемаладаги реабилитация марказида чиққан ёнғинда 19 киши ҳалок бўлди

8 март куни Гватемалада оиладаги зўравонлик қурбонлари учун мўлжалланган реабилитация марказида юз берган ёнғин оқибатида 19 киши ҳалок бўлди, деб маълум қилди маҳаллий ўт ўчирувчилар вакили.

Аввалроқ 9 киши ҳалок бўлгани маълум қилинганди. Яна 20 га яқин киши жароҳатлар олган.

Сан-Хосе-Пинула шаҳридаги марказда ёнғинга нима сабаб бўлгани ҳали аниқланмаган. Жароҳатланганлар шифохоналарга етказилганлар, воқеа жойида қутқарувчилар ва полиция ишламоқда. 

Prensa Libre порталининг маълум қилишича, бундан бир кун аввал марказдан 60 га яқин ўсмир қочиб кетган. Улар марказдаги қаттиққўл муносабат ва овқатларнинг ёмонлигига қарши бош кўтаришган. Портал маълумотларига кўра, ўсмирлар норозилик сифатида ўз матрасларини ёққанлар ва айнан шу ёнғинни келтириб чиқарган бўлиши мумкин.  

Ҳозир марказ ёнида унда сақланган ўсмирлар яқинлари тўпланишган. Улар ўз фарзандлари тақдирини билишга ҳаракат қилишмоқда.