Франциянинг бир нечта ҳудудида ўрмон ёнғинлари авж олмоқда

Франциянинг жануби ва жануби-ғарбида бир вақтнинг ўзида бир нечта йирик ўрмон ёнғинлари содир бўлмоқда. Энг йирик ёнғинлардан бири туфайли қарийб уч минг киши хавфсиз ҳудудларга эвакуация қилинди. Мамлакат бўйлаб ёнғинларни бартараф этиш ишларига икки мингга яқин ёнғин ўчирувчи жалб этилган.

Фото: AP

AFP агентлигининг хабар беришича, Франциянинг жанубидаги кучли ўрмон ёнғинлари бир неча ҳафта давом этган ўта иссиқ ва қурғоқчил об-ҳаво оқибатида юзага келган. Мамлакат бош вазири Себастен Лекорнюнинг таъкидлашича, ёнғинлар одатда кутилган муддатдан икки-уч ҳафта олдин бошланган.

Эвакуацияга сабаб бўлган энг йирик ёнғин Прованс — Алп — Кот-дʼАзур минтақасидаги Сент-Мари-ла-Мер коммунаси яқинида юзага келган. У ердан хавфсизлик нуқтаи назаридан қарийб уч минг киши кўчирилган. Эвакуация қилинганларнинг ярми кемпингларда дам олаётган сайёҳлар бўлиб, ёнғин оқибатида ўнлаб автокемперлар ва бунгалолар ёниб кетган.

Яна бир йирик ёнғин Окситания минтақасида жойлашган Пузол-Минервуа коммунаси атрофида қайд этилган. Бу ерда қарийб 9 квадрат километр ўсимлик қоплами ёнган. Ёнғинни ўчириш ишларига 800 нафар ёнғин ўчирувчи, 150 та махсус техника ҳамда бир нечта ёнғин ўчирувчи самолёт жалб қилинган.

Қутқарув ишларини соатига 70 километргача етадиган кучли шамол янада мураккаблаштирмоқда. Шунингдек, Марсел шаҳри шимолидаги Роняк ва Лансон-Прованс коммуналари атрофида ҳам ёнғинлар юзага келган.

Ёнғинлар транспорт ҳаракатига ҳам таъсир кўрсатди. Хусусан, Марсел, Бордо ва Авинон шаҳарлари ўртасидаги айрим темирйўл қатновлари вақтинча бекор қилинди.

Марселда ўтказилган матбуот анжуманида Франция бош вазири Себастен Лекорнюнинг маълум қилишича, фақат 1 июл кунининг ўзида мамлакат бўйлаб 12 квадрат километр ҳудуд ёнғиндан зарар кўрган. Ёнғинлар мавсуми бошланганидан бери эса Францияда 7 мингга яқин ёнғин қайд этилган ва улар натижасида 87 квадрат километр ер майдони куйиб кетган.

Унинг сўзларига кўра, 1–2 июл кунлари мамлакатнинг турли ҳудудларидаги ёнғинларни бартараф этиш ишларига икки мингга яқин ёнғин ўчирувчи сафарбар этилган.

Мутахассислар йирик ёнғинларни июнь ойида кузатилган рекорд даражадаги иссиқлик тўлқини билан боғламоқда. Мамлакатда 11 кун давом этган аномал иссиқ об-ҳаво пайтида айрим ҳудудларда ҳаво ҳарорати 40 даражадан ошган.

Франция миллий метеорология хизмати — Météo-France келаси ҳафта ҳам ҳаво ҳарорати яна кўтарилишини прогноз қилмоқда. Гарчи у июн ойидаги рекорд кўрсаткичларга етмаслиги айтилган бўлса-да, мамлакат ички ишлар вазири Лоран Нунес аҳолини эҳтиёткор бўлишга чақириб, «олдинда қийин кунлар кутмоқда», дея огоҳлантирган.