Тожикистон "Ц" ҳарфини истеъмолдан тўлиқ чиқариш арафасида

Тожикистонлик олимлар кишилар исми-шарифини ёзишда "Ц" ҳарфини истеъмолдан олиб ташлашни таклиф қилишмоқда. Масалан, Россия ва хориж сиёсатчилари, олимлари ва жамоат арбобларининг исми-шарифларида.

Тожикистон фанлар академияси Тил ва адабиёт институтининг тожик тили бўлими раҳбари Сайфиддин Мирзоев Asia Plus'га хабар беришича, тожик тилида аввал "Ц" ҳарфи бўлмагани сабаб уни алифбодан олиб ташлашган. 

Бироқ энди олимлар кишилар исми-шарифини ёзишда бу ҳарфни қўлламаслик ташаббуси билан чиқишди. Масалан, Марк Цукербург тожик тилида ёзилганда Марк Сукерберг, Борис Ельцин - Борис Ельсин, Клара Цеткин - Клара Сеткин, Зураб Церетелли - Зураб Серетелли ва ҳ.к.

"Тожик тилида умумий отларда "Ц" ҳарфи қўлланмаяпти. Бу ҳарф баъзи ҳолларда "С", бошқа ҳолларда эса "ТС"га алмаштирилган. Масалан, цемент-семент, цирк-сирк, концерт-консерт, конститутция-конститутсия, доцент-досент", - деди Мирзоев. 

У тожик тили орфографияси қоидаларининг 13-пунктида "Ц" ҳарфи кишилик отларида қўлланилиши ёзилганини эслатиб ўтди.  

"Биз, Тожикистон фанлар академиясининг Тил ва адабиёт институти "Ц" ҳарфини алифбога ёки қайтариш, ёки 13-пунктдан изоҳни олиб ташлашни таклиф қилгандик. Ахир, бу қоидага тўғри келмайди", - дейди Сайфиддин Мирзоев.

Унинг сўзларига кўра, тилшунос олимлардан иборат ишчи гуруҳ бу масалани кўриб чиқиб, кишилик номларида ҳам "Ц" ҳарфини қўллашни тўхтатиш таклифини беришган. Мазкур таклиф тасдиқ учун парламентга йўлланади.