ОАВ: «Ал-Қоида»га алоқадор гуруҳ Петербург теракти учун жавобгарликни ўз зиммасига олди

«Ал-Қоида» террорчилик ташкилотига алоқадор ҳисобланадиган «Имом Шомил батальони» гуруҳи Санкт-Петербург шаҳри метросида 3 апрель куни амалга оширилган теракт учун жавобгарликни ўз зиммасига олган. Бу ҳақда жангариларга алоқадор SITE Intelligence Group сайтида маълум қилинган.

Қайд этилишича, маълумотнинг биринчи манбаси Мавританиядаги «Нуакшот» ахборот агентлиги ҳисобланади. Хабарга кўра, Акбар Жалилов «Ал-Қоида» раҳбари Айман ал-Завахирининг кўрсатмаси бўйича ҳаракатланган. 

Қайд этиш керакки, шу вақтга қадар «Ал-Қоида»нинг алоҳида бўлимлари бу қадар кенг кўламли терактлар учун жавобгарликни зиммасига олмаган ва бу факт ушбу хабарнинг ҳақиқийлигини шубҳа остига қўяди. 

Петербург метросининг «Сенная площадь» ва «Технологический институт» бекатлари оралиғидаги портлаш 3 апрель куни юз берган эди. Ҳодиса оқибатида 16 киши ҳалок бўлган, 48 киши тан жароҳати олган. Портлаш иши бўйича ҳозиргача 10 киши ҳибсга олинди.