АҚШ сенати Россияга қарши санкциялар кенгайтирилишини маъқуллади

Фото: Fotolia / W.Scott

АҚШ сенати кўпчилик овоз билан Россияга қарши санкциялар кенгайтирилишини маъқуллади.

Янги чоралар Эронга нисбатан санкциялар қўллаш қонун лойиҳасига тузатмалар кўринишида тақдим этилган. Ҳужжатда АҚШ президенти Дональд Трампга конгресс розилигисиз қабул қилинган чораларни юмшатиш ёки бекор қилишга имкон бермайдиган банд бор.

Таклиф қилинаётган санкциялар Россия банклари молиялаштирилиши максимал муддатини 14 кунгача, нефть-газ тармоғи компаниялари молиялаштирилиши максимал муддатини эса 30 кунгача қисқартиришни назарда тутади. Бундан ташқари, тузатмалар киритилгач 180 кун ўтиб АҚШ молия вазирлиги конгрессга Россиянинг суверен қарзига санкциялар қўлланиши олиб келган оқибатлар ҳақида ҳисобот тақдим қилиши зарур.

Энди қонун лойиҳаси конгресснинг вакиллар палатасига кўриб чиқишга берилади ва агар у ерда маъқулланса, президентга имзолашга жўнатилади.