Шавкат Мирзиёев: фан ва амалиёт ҳамкорлигини янада мустаҳкамлаш зарур

Шавкат Мирзиёев Ўзбекистон Фанлар академиясининг Генетика ва ўсимликлар экспериментал биологияси институтининг Фарғона филиали тажриба хўжалигида бўлиб, ғалла ўрими ва ғўза парваришини кўздан кечирди. Бу ҳақда ЎзА хабар бермоқда.

Мазкур тажриба хўжалигида 21,3 гектарда ғўзанинг «ЎзФА-710», 9,2 гектарда ғалланинг «Яксарт» нави экилган. Ғалла ҳосили пишиб етилиб, ўриб олинмоқда. Хўжаликда йигирмадан зиёд киши меҳнат қилади, пахта ва ғалладан ҳар йили мўл ҳосил олинмоқда.

Давлат раҳбари ғалла йиғим-теримида иштирок этаётган фермерлар билан мулоқот қилди.

«Нон — энг азиз неъмат. Ғаллачиликни ривожлантириш, истиқболли, серҳосил навларни яратиш, ҳосилдорликни ошириш бўйича барча чораларни кўриш олимларимиз ва деҳқонларимиз олдидаги муҳим вазифалардандир. Бунинг учун фан ва амалиёт ҳамкорлигини янада мустаҳкамлаш зарур», — деди Президент.