Роналду келажаги масаласини яхшилаб ўйлаб олмоқчи

«Лилль» клуби спорт директори, аввал Мадриднинг «Реал» клубида трансфер масалалари бўйича маслаҳатчи сифатида ишлаган Луис Кампос Криштиану Роналду билан боғлиқ вазият хусусида фикрларини билдириб ўтди.

Португалиялик 32 ёшли футболчи шу ой давомида солиқчилар ва прокуратура айбловлари туфайли Испанияни бутунлай тарк этиши ҳақида хабарлар тарқалди. Футболчи «Реал» ўзини етарлича қўлламаётгани туфайли шундай қарорга келгани айтилди.

«У менга айтдики, унга яхшилаб ўйлаб олиш учун бир неча кун керак. Бу нормал ҳолат. «Реал» билан боғлиқ вазият анчайин танг, аммо бу вазият чегарадан чиққан дегани эмас. Ўйлайманки, Криштиануда якуний қарорини қабул қилиш учун етарлича вақт бор. У тўғри қарор қабул қилса керак.

У билан шу ҳафтада гаплашдим. Ҳа, у анча хафа бўлган. Вазият уни издан чиқарган. Криштиану – футболдан бошқа нарсаларга чалғишни истамайдиган ва фақат футбол ҳақида ўйлашни истайдиган футболчидир. 

Умуман олганда, Роналду ўзига билдирилаётган айбловлардан ҳайрон. Унга ўзи ҳақидаги бундай хабарларни ўқиш жуда ёқимсиз. У хотиржамликни истайди, ҳозир эса у қийин даврни бошдан кечирмоқда» – дея давом этган Луис Кампос.

«Мен қандай позицияданми? Менимча, дунёнинг энг кучли футболчиси дунёнинг энг яхши клубида тўп суради. Мен шундай фикрда қатъийман. Менимча, «Реал»дагилар Роналду қанчалар муҳимлигини яхши билишади. Буни футболчининг ўзи ҳам буни яхши тушунади», – дея «Лилль» спорт директори сўзларини келтирган ESPN.