ЖЧ кундалиги. Роналду яна йиғлади, АҚШ 4 та гол ўтказди

Жаҳон чемпионатида 1/8 финал босқичи якунига етмоқда. 7 июлга ўтар кечаси Испания Криштиану Роналду бошчилигидаги Португалияни турнирдан чиқариб юборди (1:0), АҚШ миллий жамоаси эса кечирилган Фоларин Балогун билан Белгияга йирик ҳисобда ютқазди (1:4).

Майдон ташқарисида ҳам қизиқарли воқеалар кечмоқда: Америка президенти Доналд Трамп «Балогун иши»да ФИФА раҳбарига босим ўтказганини тан олди, франциялик форвард Килиан Мбаппе эса ирқчиликка учради.

Роналду барибир жаҳон чемпионатини забт этолмади

Португалия – Испания 0:1
Гол: Мерино, 90+1 (0:1)
Португалия: Кошта, Рубен Диаш, Вейга, Нуну Мендеш (Семеду, 56), Жоау Канселу (Далот, 71), Жоау Невеш, Витиня (Бернарду Силва, 83), Бруну Фернандеш, Жоау Феликс (Леау, 71), Педру Нету (Консейсау, 83), Криштиану Роналду
Испания: Симон, Ляпорт, Кубарси, Кукуреля, Порро, Родри, Педри (Мерино, 85), Олмо (Руис, 85), Баэна (Торрес, 75), Ямал, Ойярсабал (Иглесиас, 90)
Огоҳлантиришлар: Бернарду Силва, 89. Вейга, 90 – Торрес, 90

Португалия 1/8 финалда Испанияга қарши ўйиннинг қўшимча дақиқаларида гол ўтказиб, жаҳон чемпионатини тарк этди. Бу Криштиану Роналду учун миллий жамоа сафидаги охирги ўйин бўлиб қолди.

Ўйиннинг илк дақиқаларида – майдон маркази учун кураш кечди. Португалия майдон марказини Испанияга бой бермади. Ямал ўйин дебютида Мендеш босими остида бир неча бор оддий вазиятларда тўп йўқотди. Шунга қарамай, ўйиндаги илк хавфли вазият айнан испанларда юзага келди. Саккизинчи дақиқада Олмо чизиқлар орасини кесиб ўтувчи паси билан Оярсабални яккама-якка вазиятга чиқариб юборди, аммо ҳужумчи шошиб қолди ва яқин масофадан туриб, хато зарба берди.

Кўп ўтмай Роберто Мартинес шогирдлари Роналдуни зарбдор позицияга чиқариш йўлларини излай бошлашди. Стандарт вазиятлардан бири ижро этилганида Криштиану Родри билан контактдан кейин жарима майдонида йиқилди. Аммо англиялик ҳакам Тейлор бу эпизод фолга тортмайди, деб ҳисоблади. Кейин эса Португалия сардори ўнг қанотда яхши очилди ва узатмани қабул қилиб, яқин бурчакка зарба берди – испанлар дарвозабони ишончли ҳаракат қилди.

Кейин эса сейв қилиш навбати Диогу Коштага келди: у Ламин Ямалнинг ўз услубида йўллаган айланма зарбасини ҳам, қайтган тўпга Баэна томонидан берилган иккинчи зарбани ҳам қайтарди.

Бўлим охирларида эса ташаббус португаллар қўлига ўтди ва Симон ҳам иккиталик сейв амалга оширди: у аввалига Фелишнинг бошда йўллаган зарбасини, кейин Роналду акробатик ҳолатда йўллаган зарбани бартараф этди. 41-дақиқада Португалия бу сафарги мундиалда яна бир марта стандарт вазиятни айёрона ижро этди. Мендеш олис бурчакка кучли зарба берди, аммо тўп Порронинг бошига тегди ва йўналишини ўзгартириб, тўсинга борди.

Танаффусдан кейин ҳам ўйин қарама-қарши курсларда кечди. Мендеш Ямални зарарсизлантиришда давом этди, аммо 50-дақиқада амалда ўйин натижасига таъсир кўрсатган эпизод содир бўлди. Ламин навбатдаги марта португаллар жарима майдонига ёриб кирди, уни қарши олган Мендеш хавфни бартараф этди, аммо шу вазиятда жароҳат олиб, ўйинни давом эттира олмайдиган бўлди.

Шундан кейин португаллар Ямални икки киши бўлиб қўриқлай бошлади, бу эса бошқаларнинг имкониятини яхшилади.

Ўйиннинг сўнгги қисмида футболчилар чарчаб қолишди ва  мураббийлар шахмат ўйнашга киришди. Де ла Фуэнте Педрини, Мартинес эса Витиняни майдондан олишига тўғри келди.

Ўйин овертаймга қараб кета бошлади. Аммо ўйинга қўшиб берилган дақиқалар бошланганида португаллар концентрацияни йўқотишди. Португаллар сафида захирадан ўйинга қўшилган Бернарду Силва кераксиз вазиятда Микел Меринога фол ишлатди, испанлар тўпни тезда ўйинга киритиб юборишди ва комбинация якунида «Арсенал» яримҳимоячиси дарвозабон билан яккама-якка вазиятга чиқиб бориб, ғалаба голини урди.

Португаллар қолган дақиқаларни тўлиқ ҳужумда ўтказишди, аммо мағлубиятдан қутулиб қола олишмади. Европа чемпионлари жаҳон чемпиони бўлиш йўлидаги юришини давом эттирди.

Ўйин якунланганидан кейин барча камералар йиғлаётган Роналдуга қаратилди. У фаолиятида олтинчи марта жаҳон чемпионатини эрта тарк этди, бу сафаргиси эса янада оғриқли эди – ўйиндан олдин у бу турнир фаолиятидаги охиргиси бўлиб қолишини тасдиқлаганди.

Роналду олтита жаҳон чемпионатида (ҳеч кимда бу қадар кўп иштирок йўқ) 27 ўйин ўтказди ва 11 гол урди. Аммо барибир титулни қўлга кирита олмади.

Белгия АҚШни жазолади

АҚШ – Белгия 1:4
Голлар: Де Кетеларе, 9 (0:1). Тиллман, 31 (1:1). Де Кетеларе, 33 (1:2). Ванакен, 57 (1:3). Лукаку, 90+3 (1:4)
АҚШ: Фриз, Ричардс, Рим, Робинсон (Арфстен, 90+2), Фримен, Адамс (Пепи, 72), Тиллман, Маккенни, Пулишич (Берҳалтер, 59), Дест (Рейна, 46), Балогун (Райт, 90+2)
Белгия: Куртуа, Меҳеле, Нгой, Де Кюйпер, Кастан, Раскин (Витсел, 89), Онана (Ванакен, 21), Тилеманс, Троссар (Салемакерс, 89), Лукебакио (Лукаку, 67), Де Кетеларе (Доку, 67)
Огоҳлантиришлар: Маккенни, 35. Тиллман, 69

АҚШ ва Белгия миллий жамоалари ўзаро ўйинда чоракфиналда Испанияга ким рақиб бўлишига ойдинлик киритишди. Якунда турнир мезбонлари йирик ҳисобда мағлуб бўлишди.

Айтиш мумкинки, ўйин олдидан бўлиб ўтган воқеалар Белгия футболчиларини янада жипслаштирди (ФИФА Трампнинг сўрови билан Фоларин Балогуннинг дисквалификациясини кечиктирган, Белгия томонининг эътирози эса қаноатлантирилмаганди).

Ўйин бошланиши арафасида жамоа сардори Ромелу Лукаку бутун жамоани битта жойга йиғди ва эҳтиросли нутқ сўзлади. Ва «қизил иблислар» илк дақиқалардан рақибни янчиб ташлаш учун олдинга ташланишди – европаликлар бу турнир бошидан буён бу қадар жаҳлдор кўринишмаганди. Америкаликлар дарвозабони Мэтю Фриз биринчи дақиқадаёқ қаҳрамонлик кўрсатиб, Тимоти Кастаннинг юқори бурчакка йўллаган зарбасини қайтаришига тўғри келди. Аммо у узоқ дош беролмади ва Шарл Де Кетеларе 9-дақиқада барибир ҳисоб очди. 

Мезбонлар эса майдонда умуман йўқолиб қолишди. Мухлислар Жесси Марш шогирдларини бу турнирда ҳали бу қадар иложсиз ва пароканда ҳолда кўришмаганди. Ва фақат сув ичиш учун қилинган танаффусдагина Маурисио Почеттино шогирдларини ўзига келтира олди ва кўп ўтмай ҳисоб тенглашди. Бу вазиятда Малик Тиллманнинг зарбасидан кейин тўп рақиб футболчисига теккан ҳолда йўналишни ўзгартириши америкаликларга қўл келди.

Аммо Белгия ўтказиб юборилган голни ҳис қилмади. Жамоа тўп майдон марказига келтирилиши билан яна олдинга югурди ва ҳисобда яна олдинга чиқиб олди – Де Кетеларе бу сафар Леандро Троссарнинг қанотдан узатмасини голга айлантирди. Биринчи бўлим статистикаси майдондаги вазиятни яққол ифодаларди: забалар сони – 11:3, дарвоза соҳасига тўғри борган зарбалар сони – 5:1, xG – 1,90 га 0,42. Барчаси Белгия фойдасига.

Биринчи бўлим охири ва иккинчи бўлим бошини АҚШ нисбатан яхши ўтказди, аммо 57-дақиқадаги ҳалокатли хато ўйин тақдирини ҳал қилди. Дарвозабон Фриз ҳимоячиларга ёрдам бериш учун жарима майдонини ташлаб чиқди, аммо тўпдан ўз вақтида қутулиш ўрнига сусткашлик қилди ва уни Ванакенга совға қилди – белгияликлар яримҳимоячиси эса осонлик билан бўш дарвозани ишғол этди. Америкаликлар сардори Тим Рим зарбани тўсиши мумкин эди, аммо тўп йўлига оёғини тўғри қўя олмади.

Бироз ўтиб мезбонлар етакчиси Кристиан Пулишич жароҳат олиб майдонни тарк этди. Қолган дақиқаларда америкаликлар жавоб голини уришга қаттиқ ҳаракат қилишди, аммо ўйин йирик ҳисобда якунланди. Ромелу Лукаку бу сафар ҳам захирадан ўйинга қўшилиб, ўз номини таблога ёздириб қўйди ва жаҳон чемпионатида тўртта ўйинда жокер сифатида гол урган илк футболчига айланди.

Энди «қизил иблислар» 10 июл куни чоракфинал доирасида Испанияга қарши майдонга тушади.

Трамп тан олди

АҚШ президенти Доналд Трамп ФИФАдан мамлакат миллий жамоаси ҳужумчиси Фоларин Балогуннинг қизил карточкасини бекор қилишни сўраганини расман тан олди. Аввалроқ Халқаро футбол федерацияси шов-шувли тарзда ушбу америкалик футболчининг дисквалификациясини бир йилга кечиктирганди ва унга Белгияга қарши ўйинда қатнашиш имконини берганди.

Трамп матбуот анжуманидаги сўзлари билан ҳақиқий футболни америкача соккердан у қадар фарқлай олмаслигини кўрсатиб қўйди.

«Мен эпизодни кўрдим. Спортни жуда яхши тушунаман. У ерда фол йўқ эди. Шунчаки икки кучли йигит катта тезликда югуриб, бир-бири билан тўқнашиб кетди. Бу ҳакам эса ўта шубҳали эди», – деган Трамп.

У футболчи қизил карточка учун кейинги ўйинга дисквалификация қилинишини тушуна олмаслигини, футболчи ҳали ўйнамаган ўйни учун жазоланмаслиги кераклигини айтган.

Шунингдек, Балогунни амалда Месси, Роналду, Кейн каби юлдузлар билан бир ўринга қўйган.

«Месси ким биландир тўқнашгани учун четлатилса, бунга қандай қараган бўлардингиз? Ёки Роналду кимгадир урилиб кетгани учун ўйиндан олиб ташланса? Ёки Кейн кимнидир уриб юборгани учун жазоланса? Бундай қилиш керак эмас», дейди АҚШ президенти.

Шундан кейин у ўз илтимосини ерда қолдирмагани учун ФИФА президентига яна бир бор миннатдорчилик билдириб, энди уни аввалгидан кўра кўпроқ ҳурмат қилаётганини айтган.

Мбаппе ирқчиликка учради

Жаҳон чемпионати нимчоракфиналида Франция ва Парагвай ўртасида кечган учрашув атрофида можаро давом этмоқда. Бу ўйин футбол тарихидаги энг ёқимсиз лаҳзалардан бири сифатида қолади – ўзбекистонлик ҳакам Илгиз Танташев бошқарган ушбу ўйинда жамоалар футбол ўйнашдан кўра, бир-бирига озор етказиш билан кўпроқ шуғулланишганди.

Аммо бу ҳали ҳаммаси эмаскан. Парагвайлик сенатор Селеста Амариля Франция миллий жамоаси ҳужумчиси Килиан Мбаппега ирқчилик қилиб, ўта кескин оҳангда фикр билдирди.

«Ўзини француз қилиб кўрсатаётган камерунлик. Калондимоғ, пулдор ва хунук. У бутун ўйин давомида асабийлашди ва бутун жамоаси каби ўлгудай қўрқиб кетди, улар бирорта ҳам гол ура олишмади ва бахтли тасодиф туфайлигина ғалаба қозонишди... Йигитча ҳатто ёзишни ҳам ўрганмаган, она сути ўрнига кокос сутини ичган, унинг ёнидагиларнинг энг ўқимишлиси эса шимпанзелар эди», – дея ёзган Амариля ижтимоий тармоқларда.

Унинг бу қадар ошкора нафратини Франциядагилар эътиборсиз қолдира олмасди. Маҳаллий футбол федерацияси прокуратурага мурожаат қилишини маълум қилди, Мбаппенинг ўзи эса Амариляни «манфур хотин» деб атади ва уни «жаҳон чемпионатида эҳтиросли ва шарафли ўйнаган Парагвай миллий жамоаси қаҳрамонлигини қадрсизлантириш»да айблади.

Навбатдаги ўйинлар

Жаҳон чемпионатида 1/8 финал босқичи якунланмоқда – 7 июл куни кечқурун ва 8 июлга ўтар кечаси қуйидаги ўйинлар бўлиб ўтади:

21.00. Аргентина – Миср
01.00. Швейцария – Колумбия