«Реал» ҳужумчиси Криштиану Роналду бугун яна бир бор солиқ органлари вакиллари билан муаммога дуч келди.
Hola нашри хабарига кўра, солиқ инспекциясининг божхона департаменти ходимлари Балеар оролларида оиласи билан дам олаётган футболчининг яхтасида тинтув ўтказган. Бу тинтув унинг солиқ тўламагани билан боғлиқ можарога алоқадор бўлиши мумкин.
Божхоначилар қуролланган полициячилар билан ҳамкорликда 1,5 соат давомида футболчи бўлган яхтани тинтув қилган.
Қайд этилишича, яхта Роналдуга тегишли эмас, таътил вақтида ижарага олинган. Тинтув пайтида Роналду оиласи билан яхта ичида бўлган.
Айни вақтда Роналду Испанияда 14,7 миллион евро миқдоридаги солиқни тўламаганликда айбланмоқда. Футболчи эса бу ишда ўзини айбсиз ҳисоблайди ва талаб этилаётган маблағни тўламоқчи эмас.
Роналдунинг иши бўйича суд 31 июлга белгиланган. Португалиялик футболчи судда ўз манфаатларини ҳимоя қилиши учун икки адвокат ёллаган.
