Британиялик ЕИда қолиш учун ўз уйини республика сифатида эълон қилди

Буюк Британияда истиқомат қилувчи Уильям Ричес Британиянинг Европа иттифоқидан чиқишига қарши бўлганини билдириш мақсадида, Глостерширдаги ўз уйини мустақил республика, деб эълон қилди. Бу ҳақда BBC хабар бермоқда.

Университетнинг собиқ ўқитувчиси Дин ўрмони ёнида яшайди, бу ердаги аҳолининг аксарияти эса мамлакатнинг ЕИдан чиқишига овоз берди. Фан доктори ўз уйини Миддлвотч Мустақил Республикаси сифатида эълон қилди ҳамда рафиқаси Жудитни президент этиб тайинлади.

— Демократияга қарши боришни истамаймиз, бироқ, бизнинг фикримизни эшитишни ҳам исташмади, шу сабабдан фақатгина битта вариант бор – мустақиллик. Мамлакат Евроиттифоқни тарк этмоқда, биз эса буни қилмаймиз, — деди Ричес.

Шунингдек, эркакнинг хабар қилишича, ошхонаси расмий бошқарув жойи ҳисобланади. У ўз уй-давлати чегарасини кесиб ўтмоқчи бўлган барчага 50 фунт эвазига виза беришини ҳам айтиб ўтган.