Франция ИИВ: Сурия ва Ироқдан 271 жангари қайтиб келган

Ироқ ва Сурияда ИШИД террорчи гуруҳи таркибида жангларда иштирок этган 271 нафар франциялик ватанига қайтиб келган. Бу ҳақда Франция Ички ишлар вазири Жерар Колон Le Journal du Dimanche газетасига берган интервьюсида маълум қилган.

Ўтган йилларда Франциянинг 700 га яқин фуқароси жангарилар томонига ўтиб кетган. Қайтганлари айни пайтда прокуратура органлари томонидан текширилмоқда, айримлари ҳибсга олинган.

«Ҳалок бўлган французлар сонига аниқлик киритиш мушкул иш. Қайтганлар сони эса 271 киши, шундан 54 нафари вояга етмаганлар», дея вазирнинг сўзлари келтирилган хабарда.

ИИВ раҳбари террорчилик таҳдиди сақланиб қолаётганини қайд этган. 

«Йил бошидан буён Елисей саройига қилинган икки ҳужум кузатилди, махсус хизматлар 7та ҳужумнинг олдини олишди», деган вазир.