Бугун, 8 август куни Америка Қўшма Штатлари Давлат котиби Рекс Тиллерсон расмий Бангкок вакиллари билан учрашди. Икки томон ўртасида олий даражадаги учрашув 2014 йили Таиландда амалга оширилган давлат тўнтаришида АҚШнинг «қўли» борлиги гумон қилинганидан бери илк бор ўтказилмоқда.
Давлат котибининг асосий мақсади жануби-шарқий Осиё мамлакатларининг Шимолий Кореяга нисбатан босимни янада оширишга ундашдан иборат. Тиллерсоннинг Тинч океани ва жануби-шарқий Осиё мамлакатлари бўйича ёрдамчиси Сьюзан Торнтон журналистларга берган маълумотига кўра, айни пайтда Шимолий Кореянинг етакчи компаниялари Таиландда фаол ишлаб келмоқда.
Таиланд ҳукумати ушбу учрашувга қадар, БМТ томонидан расмий Пхеньянга нисбатан қабул қилинган янгиланган иқтисодий санкцияларни қўллаб-қувватланишини билдирган эди. Эндиликда америкалик юқори даражадаги давлат мулозими Бангкокнинг янада кўпроқ КХДРдан қочиб келаётган муҳожирларни қабул қилишга чақирмоқда.
