Пхукетда икки ўзбекистонлик ушланди

Таиланднинг Пхукет халқаро аэропортида икки нафар Ўзбекистон фуқароси юкларидан 26 килограммдан ортиқ каннабис маҳсулотлари топилгани ортидан қўлга олинди. Ҳуқуқни муҳофаза қилувчи идоралар уларни мазкур моддаларни мамлакатдан божхона расмийлаштирувисиз олиб чиқишга уринганликда гумон қилмоқда.

Таиланд божхона хизмати маълумотига кўра, воқеа 1 июл куни Пхукет халқаро аэропортида юкларни текшириш чоғида аниқланган.

Текширув давомида икки нафар 26 ёшли Ўзбекистон фуқаросининг чемоданларидан вакуумли қадоқланган қуритилган каннабис гуллари, каннабис смоласи ва қайта ишланган каннабис маҳсулотлари топилган.

Биринчи гумонланувчининг тўртта юкидан иккитаси шубҳа уйғотган. Текширув натижасида умумий оғирлиги 9,8 килограмм бўлган 30 та қадоқланган қуритилган каннабис, шунингдек, 1,03 килограмм оғирликдаги 14 дона қайта ишланган каннабис маҳсулоти аниқланган.

Иккинчи фуқаронинг юкларидан эса 9,8 килограмм қуритилган каннабис, 4,1 килограмм каннабис смоласи ҳамда умумий оғирлиги 2 килограмм бўлган турли қайта ишланган каннабис маҳсулотлари топилган.

Ҳуқуқни муҳофаза қилувчи органлар икки шахсга нисбатан Таиланднинг 2017 йилги Божхона тўғрисидаги қонунига мувофиқ товарларни божхона тартиб-қоидаларига риоя қилмасдан мамлакатдан олиб чиқишга уриниш бўйича айблов қўйилганини маълум қилди. Шунингдек, уларга гиёҳвандлик воситалари ва назорат қилинадиган ўсимликлар муомаласига оид қонунчиликни бузиш юзасидан ҳам айбловлар билдирилган.

Қўлга олинганлар ва мусодара қилинган ашёвий далиллар кейинги тергов ҳаракатларини ўтказиш учун Сакху полиция бўлими терговчиларига топширилган.

Таиланд божхона хизмати каннабисни мамлакатдан ноқонуний олиб чиқиш жиноят ҳисобланишини таъкидлади. Амалдаги қонунчиликка кўра, бундай ҳуқуқбузарлик учун ҳар бир килограмм каннабис учун 30 минг батгача жарима ёки суд қарорига қараб озодликдан маҳрум қилиш жазоси қўлланиши мумкин.

Маҳаллий нашрлар маълум қилишича, сўнгги вақтларда хорижлик сайёҳлар иштирокида каннабис билан боғлиқ ҳодисалар кўпайгани сабабли Пхукет маъмурияти ушбу маҳсулотлар айланмаси устидан назоратни янада кучайтириш тарафдори эканини билдирган.