Қозоғистоннинг 10 йилга қамалган собиқ бош вазири муддатдан аввал озодликка чиқди

Қозоғистон собиқ бош вазири Серик Ахметов муддатдан олдин озодликка чиқди. У 2015 йилда 10 йилга озодликдан маҳрум этилганди. Бу ҳақда Tengri News хабар бермоқда.

Хабарда айтилишича, у Қарағанда вилоятидаги колония дарвозасидан чиқиб, автомобилга ўтирган ва кетиб қолган.

«Мен режалар билан ҳали бир қарорга келганим йўқ. Нима билан шуғулланишимни вақт кўрсатади. Ҳозир уйга бораман», - деган у колония олдида йиғилиб турган ОАВ ходимларига.

Ахметов пора олиш, хизмат ваколатларини суиистеъмол қилиш, тадбиркорлик фаолиятида ноқонуний тарзда иштирок этиш ва ўзганинг мулкини жуда катта миқдорда ўзлаштиришда айбланганди.