Еврокомиссиядагилар Испанияда фуқаролик уруши бошланишидан хавфсирамоқда

Фото: Reuters

Каталониядаги вазият таранглашуви Европанинг марказида фуқаролар урушини келтириб чиқариши мумкин. Бундай фикрни бюджет масалалари бўйича еврокомиссар Гюнтер Эттингер билдириб ўтган.

«Вазият жуда ва жуда хавотирли. Европанинг марказида фуқаролик уруши хавфи юзага келган. Мадрид ва Барселона ўртасида тинч музокараларга умид қилиш мумкин холос», дея Эттингернинг сўзларини келтирган The Telegraph.

Эттингер «агар сўров тушса» Европа Иттифоқи вазиятга аралашиши мумкинлигини айтган.

1 октябрь куни Каталонияда Испания қироллигидан ажраб чиқиш бўйича референдум ўтказилди. Испания ҳукумати ушбу референдумни ноқонуний деб топди ва сайлов участкаларини ёпиш учун полиция жўнатди. Натижада сайловчилар ва полициячилар ўртасида тўқнашувлар келиб чиқди. Полиция одамларни сайлов участкаларидан ҳайдаш учун резина ўқлар ва дубинкалар қўллаган. Натижада, 800 нафардан ортиқ сайловчи тан жароҳатлари олган.

Референдум натижаларига кўра, каталонияликларнинг 90 фоиздан ортиғи мустақиллик учун овоз берган. Испания ҳукумати ва Еврокомиссия референдумни ноқонуний деб топди. Аммо ҳафта охирида Каталония ҳукумати мустақиллик эълон қилмоқчи.

Тайёрлаган Азиз Қаршиев

#референдум #фуқаролик уруши #Каталония

Испаниянинг шимолий-шарқий ҳудудида, Каталония автономиясида, истиқомат қилувчи аҳоли 1 октябрь каталонларнинг мустақиллик масаласини ҳал этиш учун кўчага чиқди. Расмий Мадрид ушбу ҳаракатни йўққа чиқариш мақсадида маҳаллий полиция кучидан фойдаланмоқда.