Экзитполлар: Қозоғистон янги конституция қабул қилинишини қўллаб-қувватлади

Қозоғистонликларнинг аксарияти асосий қонунга ўзгартишлар киритишни қўллаб-қувватлади, бу экзитпол натижаларида акс этган. Дастлабки маълумотларга кўра, овоз беришда иштирок этиш даражаси 73 фоиздан ошган.

Фото: РИА Новости / Ертай Сарбасов

Қозоғистонда янги конституция лойиҳаси бўйича референдумда овоз бериш якунланди. 15 март, якшанба куни кечқурун эълон қилинган экзитпол натижаларига кўра, овоз берганларнинг мутлақ кўпчилиги асосий қонунга ўзгартишлар киритишни қўллаб-қувватлаган.

Евросиё интеграцияси институти экзитполи маълумотига кўра, референдум иштирокчиларининг 86,7 фоизи асосий қонуннинг янги таҳрири учун овоз берган. Сўровнома мамлакатнинг 17 вилояти ва учта энг йирик шаҳридаги 200 та участка чиқишида ўтказилган бўлиб, қарийб 30 минг респондентни қамраб олган.

“Комплекс ижтимоий тадқиқотлар институти — Остона “Социс-А” хусусий жамғармаси ўтказган бошқа бир экзитпол эса қўллаб-қувватлаш даражаси 87,4 фоиз бўлганини кўрсатди. Amanat партиясининг Жамоатчилик сиёсати институти маълумотларига кўра, сўров иштирокчиларининг 88,6 фоизи янги конституцияни қўллаб-қувватлаб овоз берган.

Овоз беришнинг расмий натижаларини Марказий референдум комиссияси етти кун ичида эълон қилиши керак.

Марказий сайлов комиссиясининг дастлабки маълумотларига кўра, мамлакат бўйича иштирок даражаси 73,24 фоизни ташкил этган. Жами овоз беришда Қозоғистоннинг 9 126 850 нафар фуқароси қатнашган. Қозоғистон МСК янги конституция бўйича референдумни аллақачон ўтган, деб ҳисоблаш мумкинлигини эълон қилди.

Энг юқори иштирок даражаси — 93,04 фоиз Қизилўрда вилоятида қайд этилган, энг паст кўрсаткич эса — 33,43 фоиз мамлакатнинг энг йирик шаҳри ва 1997 йилгача Қозоғистон пойтахти бўлган Олмаота шаҳрида кузатилган. Ҳозирги пойтахт Остонада иштирок даражаси 60,36 фоизни ташкил этган.

Янги конституция лойиҳаси Қозоғистон президенти Қосим-Жўмарт Тўқаев ташаббуси билан ишлаб чиқилган. Ҳужжатда, жумладан, икки палатали парламентни тугатиб, уни бир палатали қурултой билан алмаштириш, шунингдек, президентга бош прокурор, Конституциявий суд ва Олий суд раислари, Миллий банк раҳбари ҳамда Миллий хавфсизлик қўмитаси раҳбарини якка тартибда тайинлаш ҳуқуқини бериш таклиф этилган.

Бундан ташқари, вице-президент лавозимини жорий этиш режалаштирилмоқда, уни ҳам президент бир палатали парламент розилиги билан тайинлайди. Агар ушбу қонунчилик органи икки марта у таклиф қилган вице-президент, бош вазир ва спикер лавозимларига номзодларни маъқулламаса, президент қурултойни тарқатиб юбориши мумкин.