БМТ Хон-Шайхундаги кимёвий ҳужум ким томонидан амалга оширилганини маълум қилди 

Суриянинг Идлиб вилоятидаги Хон-Шайхун шаҳрига 2017 йилнинг 4 апрель куни юз берган кимёвий ҳужум Башар Асад режими тарафдорлари томонидан амалга оширилган. Бу ҳақда БМТ ва Кимёвий қуролларни тақиқлаш бўйича ташкилот Қўшма механизмининг Хон-Шайхундаги кимёвий ҳужум бўйича қўшма ҳисоботида айтилади. У БМТ Хавфсизлик Кенгашида тақдим этилди.

Ҳисобот муаллифларининг кўрсатишича, Суриядаги шаҳарда юздан ортиқ тинч аҳоли вакиллари ҳаётдан кўз юмишига Асад тарафдорлари масъулдирлар.

Ҳисоботда ишонч билдирилишича, «Хон-Шайхунда зарин заҳарловчи гази Башар Асад режими томонидан қўлланган».

БМТ ва Кимёвий қуролларни тақиқлаш бўйича ташкилотнинг Қўшма механизми 2015 йилда Сурияда кимёвий қуролдан фойдаланиш ҳолатларини аниқлаш мақсадида ташкил этилган.