«Ўзингиз зерикмадингизми?». Путинни «бобой» деб аташди ва «2-рақамли сиёсатчи» ҳақида сўрашди 

Россия президенти Владимир Путин катта матбуот анжумани давомида «бай-бай» сўзини «бобой» сўзи билан адаштириб юборди.

Путин саволлардан бирига жавоб қайтарар экан, кимнингдир плакатида «Путин бай-бай» сўзларини кўрганини ёдга олди.

Аслида эса у ерда «Путин бобой» деб ёзилган бўлган. Плакатни ушлаб ўтирган журналист аёлнинг аниқлик киритишича, «бобой» татар тилидан «бува» деб таржима қилинади, ҳамда Татаристондаги болалар Путинни айнан шундай деб чақиришар экан. Путин журналист аёлнинг тил сиёсати ҳақидаги саволига жавоб қайтарган.

Шунингдек Владимир Путин нима учун унинг президентлиги давомида Россияда «иккинчи рақамли сиёсатчи», мухолифатдан номзод пайдо бўлмагани ҳақидаги саволга жавоб қайтарди.

Life журналисти Путинга шундай савол билан мурожаат қилган: «Сизнинг ўзингиз зерикмадингизми?».

«Энг оддий изоҳ шундай бўлган бўларди – менинг ўзим ўзимга рақобатчиларни тарбиялай олмайманку», - деган Путин.

Шу билан бирга, унинг тан олишича, сиёсий муҳит рақобатга тўла бўлиши кераклиги ҳақида кўп ўйлайди. Президент бунга ҳаракат қилишга ваъда берган.

Бундан ташқари, Путин нега аксарият одамлар муаммони ҳал қилишда фақат президентга мурожаат этишни маъқул кўришлари ҳақида ҳам айтиб ўтди.

Унинг сўзларига кўра, қўлда бошқариш ҳақидаги уйдирма бўрттириб кўрсатилган. Бироқ унинг таъкидлашича, минтақаларда «кўп ҳолатларда уддасидан чиқилаётгани йўқ», лекин айнан шунинг учун ҳам матбуот анжуманлари ва тўғридан-тўғри мулоқотлар ўтказилмоқда.

Унинг таъкидлашича, «тўғридан-тўғри бошқарув» минтақалардаги ишларни янада тартибга солишда қўл келади. У минтақалар раҳбарлари билан фуқаролардан келиб тушган муаммоларни муҳокама қилишига эътибор қаратди. 

Россия президенти Владимир Путин бизнесни ҳаддан ташқари кучли назорат қилиш ва коррупция ҳақидаги саволга ҳам жавоб қайтарди.

Путиннинг таъкидлашича, биринчидан, бизнесни текширишлардан 2-3 йиллик «таътиллар» жорий этилган. Режали текширувлар сони қисқармоқда. Режадан ташқари бўлганлари миқдори эса – режадагиларнинг 30 фоизидан ошмаслиги керак.

«Умуман олганда, менинг фикримча, шундай ўзгаришлардан сўнг вазият яхши томонга ўзгармоқда», - дея маълум қилди Путин.

Бошқа масала, Путиннинг сўзларига кўра, - бу ҳуқуқни муҳофаза қилиш органлари иши бўлиб, у ерда «ҳозирча яхши томонга катта ўзгаришлар кўринаётгани йўқ».

«Мураккаб савол. Яшириб ўтирмайман. Бу ерда ишлар қандай йўлга қўйилганидан кўнглим тўлмоқда, деб айта олмайман», - дея қайд этиб ўтди Путин.