Вафот этган онасининг пенсия пулларини 24 йил ўзлаштириб келган аёл фош этилди

АҚШнинг Калифорния штати Сакраменто шаҳридаги федерал суд 66 ёшли Эмма Картер-Александрни 13 ойлик қамоқ жазосига ҳукм қилди, у 20 йилдан ортиқ вақт давомида вафот этган онасининг пенсия пулларини ўзлаштириб келган. Бу ҳақда Fox News хабар бермоқда.

Таъкидланишича, аёл 1991 йилнинг апрелида ўзининг онаси Дороти Гриффинга қараш бўйича мажбуриятни бўйнига олган ҳамда пенсия пуллари бўлган чекларни нақдлаштириб олиш ҳуқуқини қўлга киритган. Маблағлар ойда бир маротаба юборилган.

Телеканал маълумотларига кўра, Гриффин 1993 йилда вафот этган. Шу билан бирга, Картер-Александр онаси бу пулларни қандай сарфлаётгани ҳақида мунтазам равишда ҳисобот бериб борган. Аслида эса жиноятчи пенсия маблағлари ёрдамида ўз харажатларига тўловларни амалга оширган, жумладан, авиачипталар сотиб олган, меҳмонхоналардаги хоналарга пул тўлаган, машинани таъмирлатишда фойдаланган ҳамда дўконлардан харидларни амалга оширишда ишлатган.