Дубайда дунёдаги энг катта финжон чой билан тўлдирилди 

Дубайда 5000 литр сиғимга эга финжон Карак чойи билан тўлдирилди ва бу янги Гиннесс рекорди сифатида қайд қилинди. Рекорд натижа Global Village ярмаркасида ўрнатилди. Финжоннинг баландлиги 3,66 метрни, ичи диаметри 1,42 метрни ташкил қилади. Финжон ярмаркада 1 февралгача туради, барча ташриф буюрувчилар унинг фонида суратга тушишлари мумкин бўлади. 

Финжонга қуйилган чойни 120 ошпаз бир неча соат давомида тайёрлаган: финжони тўлдириш 25 январь соат 4да бошланган. Чойни тайёрлаш учун сувдан ташқари 155 кг чой кукуни, 270 кг қуруқ сут, 360 кг шакар, 135 кг занжабил, 4,6 кг чиннигул, 27 кг долчин ва 27 кг кардамон ишлатилган.