Brexit’дан кейин Британияга келувчи Европа Иттифоқи фуқаролари ҳуқуқлари чекланиши мумкин 

Буюк Британия бош вазири Тереза Мэй Brexit бўйича музокаралар вақтида Европа Иттифоқи билан Brexit амалга ошадиган 2019 йил 29 мартдан кейин ўтиш даври давомида Буюк Британияга келувчи ЕИ фуқароларининг ҳуқуқларини чеклаш бўйича келишиб олмоқчи. У бу ҳақда 1 февралда маълум қилди. 

“Буюк Британияга 2019 йил мартигача келувчи исталган европалик бизнинг ўтган йилги келишувимизда қайд қилинган ҳуқуқларга (жумладан, мамлакатда муддатсиз қолиш ҳуқуқига) эга бўлади. Ўтиш даври якунлангандан кейин келадиганлар эса у амал қилган вақтда келганлар эга бўладиган ҳуқуқларга эга бўладилар”, деб айтган Мэй.

Financial Times нашрининг ёзишича, Мэй шу тариқа Европа Иттифоқи билан музокаралардаги позициясини қатъийлаштирмоқчи. Брюссель Буюк Британияга ўтиш даврида (у 2019 йил 29 мартда бошланиб, 2020 йил 31 декабргача давом этиши керак) келадиган европаликлар Brexit’гача келганлар каби ҳуқуқларга эга бўлишларини талаб қилмоқда. Бошқача айтганда, Брюссель европаликлар Қироллик ҳудудида муддатсиз бўлиш ҳуқуқини олишларига умид қилмоқда. Бироқ Мэй қатъийлик кўрсатмоқчи. Нашр буни Мэйнинг ўзининг консерваторлар партияси аъзоларига Брюссель талабларига рози бўлиб кетавермаслигини кўрсатиш истаги билан тушунтирмоқда. “Энди 2019 йил мартидан кейин мамлакатга келувчиларга бошқача ёндашув бўлади, чунки улар Европа Иттифоқидан ташқарида бўлган давлатга келадилар”, деб айтган Мэй.     

Brexit бўйича музокаралар 2018 йил ноябригача давом этиши мумкин, шундан кейин томонларда эришилган келишувларни миллий парламентларда ратификация қилиш учун ярим йил вақт бўлади. Brexit’нинг ўзи 2019 йил 29 мартда амалга оширилиши керак, сўнгра 2 йиллик ўтиш даври амал қилади.