Беларусь Донбассга ўз тинчликпарварларини юбориш таклифи билан чиқди

Беларусь ТИВ раҳбари Владимир Макей Украинага беларуслик тинчликпарварларни юбориш таклифи билан чиқди. Бу Донбассдаги можарога ечим топиш учун кераклиги айтилмоқда. ТИВ раҳбари бу ҳақда «Известия» газетасига берган интервьюсида маълум қилган.

«Можарода бўлган томонларга ёрдам беришнинг қўшимча усули Донбассга тинчликпарварларни киритиш бўлиши мумкин – албатта, улар орасида беларуслар ҳам бўлади», - деди у. Макейнинг таъкидлашича, Минск бу можарода ҳам Украина томони, ҳам Донецк ва Луганск «республикалари»га нисбатан «ҳалол» позицияда турибди. «Биз қандайдир мақтовлар ортидан қуваётганимиз йўқ. Бироқ бу можаро бизнинг минтақа, бизнинг оилада. Ҳақиқатдан ҳам шундай», - дея қайд этган Беларусь ташқи ишлар вазири.

Макейнинг билдиришича, Украинадаги можарога тинч музокаралар шаклини кенгайтириш ҳам ечим сифатида хизмат қилиши мумкин. Унинг эслатишича, бу ҳақда Беларусь президенти Александр Лукашенко гапирган. ТИВ раҳбари сўзларига кўра, Беларусь етакчиси музокаралар жараёнига «бошқаларни», бироқ аслида бундан жуда манфаатдор бўлган давлатларни, жумладан АҚШни» ҳам жалб этишни таклиф қилган.