Ҳавайи оролларида, Маун-Лоа вулқони ёнбағрида Марсга парвозни имитация қилиш мажмуаси барпо этилганига анча бўлган. Энди Ҳавайи университетидан тажриба ташкилотчилари ушбу тажриба учун бутун дунёдан ипштирокчиларни танлаб олишмоқда. Таъкидланишича, ушбу тажрибада иштирок этиш учун 21 ёшдан 65 ёшгача бўлган соғлом ва бир неча ой “яккаликда ўтказишга” тайёр кўнгиллилар талаб қилинади.
Номзодларга қўйилаётган талаблар орасида зарарли одатлар йўқлиги, олий техник таълим, инглиз тилини яхши билиш ва мураккаб шароитларда ишлаш тажрибасига эга бўлиш кабилар бор. Тажрибада иштирок этишни истовчилар 2 апрелгача ариза топширишлари мумкин. Тажриба раҳбарларининг таъкидлашича, улар аризаларни нафақат америкаликлардан, балки дунёнинг исталган жойидан бўлган кишилардан қабул қилишмоқда.
Иштирокчиларга ташқи дунёдан тўлиқ узилган ҳолда етарлича қийин бўлган илмий тадқиқотлар дастурини бажаришлари керак бўлади. Олимлар иштирокчилар ортидан 115 квадрат метрлик павильон бўйлаб ўрнатилган видеокамералар ёрдамида кузатув олиб борадилар.
Бундай илк тажриба 2013 йилда бўлиб ўтган. Охиргиси эса бир ой олдин бошланиши керак эди, бироқ бошлангандан кейин бир неча кун ўтгач иштирокчилардан бирининг иштирок этишни давом эттиришдан бош тортгани сабабли бекор қилинган.
