Ўзбекистонлик «гастролёрлар» гипноз ёрдамида пенсионерларни алдаб келган – Олмаота ИИД

Ўзбекистонлик беш нафар шахс олмаоталик пенсионерларни гипноз ёрдамида алдаб келган, деб хабар қилмоқда шаҳар Ички ишлар департаменти матбуот хизмати.

ИИД маълумотларига кўра, жиноий гуруҳ таркибида – аввал Ўзбекистонда жиноий жавобгарликка тортилган ўзбекистонлик беш нафар шахс бор.

«Олмаотага жиноятчилар нисбатан яқинда келишган, бироқ уларнинг ташрифи фақат жиноят содир этишни мақсадида бўлгани ойдинлашди», - дея таъкидлайди полиция.

«Фуқаролар пенсионерларни алдаб келишган. Пул купюраларини текшириш ҳамда кейинчалик янгиларига алмаштириш баҳонаси билан улар пенсионерларнинг йиғиб қўйган пулларини ўзлари билан олиб кетган. Аниқланишича, жиноий гуруҳдан бўлган аёллар фирибгарлик чоғида гипноздан фойдаланишган: кейинчалик пенсионерлар ўз пулларини бегона одамларга қандай топширишганини қийинчилик билан ёдга олишди. Жиноятчилар баъзи ҳолатларда пенсионерларни банккача кузатиб боришган ва эҳтимолий қурбон ҳисоб рақамдан пулларни ечиб олиши ҳамда уларга топширишини кутишган. Бугунги кунда жиноий гуруҳнинг барча иштирокчилари ушланди ва қамоққа олинди», - дея хабар берган Бостандик тумани ИИД ҳузуридаги полиция бўлими бошлиғи Тимур Осекбаев.

Қайд этилишича, улар 3 млн.дан кўпроқ тенгени ўзлаштириб юборган.