«Бунёдкор» - «Бухоро» ўйини жонли эфирдан олиб ташланди

Ўзбекистон Суперлигаси 4-туридан ўрин олган «Бунёдкор» - «Бухоро» ўйини тўғридан-тўғри намойиш қилинмайдиган бўлди.

«Спорт» ТВ хабарига кўра, техник носозлик туфайли, ўйин ёзиб олинган ҳолда, соат 22:50да эфирга узатилади. 

Championat.asia хабарига кўра, «Бунёдкор» стадиони ёнида янги кўприкнинг қурилиш ишлари олиб борилмоқда. Айнан шу қурилиш вақтида, ер остидан ўтган оптик толали кабел симларига шикаст етказилган. Бу кабелларсиз ўйин жонли равишда эфирга узатилмайди.

Шу пайтгача Суперлиганинг барча ўйини «Спорт» ТВ томонидан жонли эфирда намойиш қилиниб келаётганди.