Украинада ишлаб чиқарилган илк вертолёт синовдан ўтказилди 

Украинада ишлаб чиқарилган “Надежда” вертолёти Запорожьеда илк парвозини амалга оширди. Бу ҳақда “Мотор Сич” корхонаси матбуот хизмати маълум қилди. Вертолётнинг синов парвози видеоси YouTube’да жойлаштирилган.

Украинада ишлаб чиқарилган илк МСБ-2 “Надежда” вертолёти Ми-2 вертолётининг модернизация қилинган варианти ҳисобланади. Вертолёт 70 фоизга композит материаллардан иборат. Вертолёт бир йил давомида синовдан ўтказилади.

Йўлларни патруллаш, қувурлар ва газ қувурларини мониторинг қилиш ва бошқа мақсадлар учун мўлжалланган вертолёт 2017 йил августда Запорожьедаги “Мокра” аэродромида илк бор тақдим қилинган. 

Вертолётни яратган “Мотор Сич” корхонаси авиадвигателлар ва газ турбина қурилмаларини ишлаб чиқаришга ихтисослашган бўлиб, унинг маҳсулотлари 120 та давлатда самолётлар ва вертолётларда қўлланади.