Хабиб Нурмагомедов Конор Макгрегор билан музокаралар олиб борилаётганини маълум қилди 

Россиялик аралаш услуб жангчиси Хабиб Нурмагомедов UFC’нинг икки вазн тоифасидаги собиқ жаҳон чемпиони, ирландиялик Конор Макгрегор билан жанг ўтказишга қизиқиш билдирмоқда. Хабибнинг фикрича, жанг йил охиригача бўлиб ўтиши керак. Бу масала бўйича томонлар ўртасида музокаралар бошлаб юборилган.

Маргрегор октагонга деярли 1,5 йил чиқмаган ва шу сабаб унвонларидан маҳрум этилган. У апрелда Нью-Йорк полицияси томонидан UFC жангчилари, жумладан Нурмагомедовни олиб кетаётган автобусга ҳужум қилгани сабабли ҳибсга олиниб, кейин гаров пули эвазига қўйиб юборилганди. Жангчи автобусга аравачани отиб, унинг ойнасини синдирган. Бу ҳужум оқибатида бир неча жангчига кичик жароҳатлар етганди.

“Фикримча, у суд иши билан чўзиб ўтирмайди. Агар Нью-Йорк атлетика комиссияси уни лицензиядан маҳрум этса, биз у билан Лас-Вегасда ёки бирор ҳовлида уришишимиз мумкин. У билан музокаралар бормоқда, бироқ агар улар чўзиб юборилса... Мен уларнинг узоқ чўзилишини истамайман. Шу йил жанг қилиш керак, 7 киши бир кишини кутиб ўтирмайди. Мен Конор билан жанг қилмоқчиман. Агар бунинг имкони бўлмаса, унда менга Дастин Порьени беринг. Ёки бошқа бир жангчини”, деб айтган Нурмагомедов.

8 апрелга ўтар кечаси Нурмагомедов Нью-Йоркда ўтган мусобақада америкалик Эл Яквинтага қарши жангда чемпионлик камарини қўлга киритган. Дастлаб унинг рақиби яна бир америкалик жангчи Тони Фергюсон бўлиши керак эди, бироқ у жанг олдидан тиззасидан жароҳат олган.