Порошенко Донбассда бирлашган кучлар амалиёти бошланганини эълон қилди

Украина президентининг маълум қилишича, Донбассдаги “террорчиликка қарши амалиёт” режими якунланди. Бу ҳақда Пётр Порошенко Twitter’даги саҳифасида ёзган.

Тошкент вақти билан соат 16:00да ТҚАнинг ўрнига Украина Бирлашган кучлари амалиёти (БКА) жорий этилди. Киевнинг фикрича, аввалги шакл ўзининг долзарблигини йўқотиб бўлган.

Ижтимоий тармоқда эълон қилинган видеода БКА бошланиши ҳақидаги фармонни имзолаш пайти кўрсатилган. Энди ҳарбий амалиётга раҳбарлик қилиш Украина Хавфсизлик хизматидан ҳарбийларга ўтади. Шу билан бирга, Киев аниқ “террорчиликка қарши амалиётларни” истисно этмаяпти. ТҚА режими таҳдид пайдо бўлса, исталган вақтда жорий этилиши мумкин, дея аниқлик киритди Порошенко.