Тошкентнинг Бунёдкор ва Чўпонота кўчалари кесишмасидаги кўприк қачон фойдаланишга топширилиши маълум қилинди

Тошкент шаҳрининг Бунёдкор ва Чўпонота кўчалари кесишмасидаги кўприк жорий йилнинг июнь ойида фойдаланишга топширилади. Бу ҳақда «Халқ сўзи» хабар беради.

«Ўзбекистон темир йўллари» акциядорлик жамиятига қарашли «Кўприк қурилиш трести» корхонаси мутахассислари томонидан қурилаётган кўприкнинг умумий узунлиги 667,5 метрни ташкил этади.

Кўприкнинг эстакада қисмининг узунлиги 488,5 метр бўлиб, баландлиги 8, кенглиги 24,5 метрни ташкил этади. Иншоот жами 21 та устун устида барпо этилмоқда. Бу ерда пиёдалар учун ҳам қатор қулайликлар яратилади. Хусусан, умумий узунлиги 124 метр бўлган иккита пиёдалар ўтиш кўприги қурилади, шунингдек, ёши кекса ва ногиронлар учун махсус лифт ҳамда эскалатор ўрнатилади.