Ишбилармонларни алдаб НАСА учун "янги қурилма"га пул тўплаган ота-бола фош қилинди

Деҳлида НАСА учун 375 миллиард рупийлик (5 миллиард доллар атрофида) қурилма ишлаб чиқаётганини таъкидлаган ота ва бола қўлга олинди. 

Янги ускуна синовлари бир неча марта "ноқулай об-ҳаво" туфайли бекор қилинганидан кейин шубҳага борган ишбилармон маҳаллий ҳуқуқ-тартибот органига мурожаат қилган. У полицияга мурожаат қилиб, фирибгарларга 200 минг доллардан ортиқ пулни топширгани ҳақида сўзлаб берган.

Полиция маълумотларига кўра, 56 ёшли Мохан Брар ва 30 ёшли Нитин Мохан Брар Деҳли, Уттар-Прадеш ва Уттаркханднинг 30 фуқаросини алдашган. Деҳли полицияси ходими Алок Кумарнинг айтишича, гумондорлар қўлга олиш вақтида алюминий фольгадан ясалган скафандрда бўлишган. Ота ва боланинг ёнида шунингдек ноутбук, принтер, шахсни тасдиқлашга доир сохта гувоҳномалар, чет эл чек китобчаси бўлган ва улар Audi автомобилида ҳаракатланаётган бўлган. 

Қўлга олинган шахслар жабрланувчиларга "чақмоқ ва момақалдироқдан электр энергияси ишлаб чиқаришга ёрдам берувчи" қурилма ишлаб чиқарганлари ҳақида айтишган. Уни гўёки Ҳиндистон мудофаа тадқиқотлари ва ишланмалари ташкилоти орқали НАСАга сотиш режалаштирилган. 

Фирибгарларнинг сўзларига кўра, қурилма чақмоқ урган "ноёб мис" асосида ишлаб чиқилган, шунинг учун "гуручга магнитдек таъсир қилган".

"Қўлга олинган шахслар мис ликопча ёки бошқа мис идишни олиб, уни суюқ магнит билан қоплашган ва сўнгра қайнатилган гуручни металл заррачалари билан аралаштиришган. Жабрланувчиларни алдаш мақсадида улар гуручни магнитлаштирилган идишга отишган", - дейди полициячи Алок Кумар.

Брарлар шунингдек харидорларни товар ҳақиқий эканлигига ишонтириш мақсадида Ҳиндистон мудофаа тадқиқотлари ва ишланмалари ташкилоти ходимлари ролини ўйнаган актёрларни ҳам жалб қилишган. Актёрлар бунинг учун 20 минг рупий (300 доллар атрофида) маош олишган.

Бошқа бир ишбилармон Нарендер Сайни Вирендер билан бир неча йил илгари танишгани ҳақида сўзлаб берди. У компания "гуруч магнетизатори"ни ишлаб чиқиб, уни НАСАга сотишини айтган ва Сайнини унга пул тикишга чақирган.

Вирендер қурилма синовлари муваффақиятли ўтса, Сайни 100 миллион рупий (1,5 миллион доллар атрофида) олишига ишонтирган. Улар шартнома тузишган ва ишбилармон унга 8,7 миллион рупий (130 минг доллар) берган. Сайнини воқеага ишонтириш учун ҳатто идорага ҳам олиб боришган.

Тест Хапур шаҳрида ўтказилиши керак бўлган, бироқ жой "нобоплиги" сабаб уни тугаллашга муваффақ бўлинмаган.

Полициянинг маълум қилишича, Брарлар Нью-Йоркда ойига 60 минг рупийлик уйда ижарада яшашган, уларнинг Деҳлида еттита идораси бўлган. Улар люкс тоифали автомобилларда ҳаракатланишган ва икки қуролланган қўриқчи билан юришган. Бундан ташқари, эркаклар инглиз тилини яхши билишган, шу боис кўпчилик уларнинг фирибгарлиги ҳақида ўйламаган ҳам. 

Бундан аввал ота ва бола 17 миллион рупий (250 минг доллар)га сотилган илонлар савдоси учун қўлга олинган. Улар бу илонлар ноёб экани ва улар шифобахш хусусиятга эга эканлигини айтиб алдашган. Кейинчалик уларни гаров эвазига қўйиб юборишган. 1990-йилларда Вирендернинг устахонаси бўлган ва у бу ерда ўғли билан ишлаган. Молиявий сабаблар туфайли улар сеҳрли кўзгу ва икки бошли илон каби "ноёб" предметлар билан савдо қилиб, одамларни алдай бошлашган.