Тугма босиб ўт олдириладиган машиналар туфайли АҚШда 12 йил ичида 28 киши вафот этди

The New York Times газетасининг хабар беришича, 2006 йилдан буён Қўшма Штатларнинг 26 нафар фуқароси тугмаси босиб ўт олдириладиган машиналарнинг мотори ўчирилмаганлиги туфайли ҳалок бўлишган. Мисол тариқасида, Флоридада яшаган Дэвид Шаубнинг тарихи келтирилади.

«Фред Шауб Toyota RAV4 автомобилини ўз гаражига ўчирмасдан қўйиб кетиб, симсиз калит билан қўшни хонага ўтган. У автомобилни ўчирдим деб ўйлаган. Орадан йигирма икки соат ўтгач, уни жонсиз ҳолда топишган. У ухлаётганида уй ис газига тўлиб бўлган», деб ёзади The New York Times.

NYT муаллифлари шу давр ичида 45 киши ўчирилмаган тугмали машиналардан ўлмай омон қолишганини ҳам қўшимча қилишган. Уларнинг айримларида ис гази билан боғлиқ бош мия жароҳати аниқланган.

NYT’нинг қайд этишича, 2018 йилгача АҚШда савдога чиқарилган автомобилларнинг тенг ярми махсус калит талаб этмайдиган, прибор панелидаги махсус тугма билан ишга тушириладиган ўт олдириш тизими билан жиҳозланмоқда. Илк марта бундай технология 2000-йиллар бошида пайдо бўлган.

2011 йилда Америка автомуҳандислар жамияти авто ишлаб чиқарувчиларни машиналарга ўчирилмаган двигателлар ҳақида хабар бериш тизимини ўрнатишга чорлаган. Кейинроқ Йўл ҳаракати хавфсизлиги миллий хизмати ҳам шундай талаб билан чиққан. Ҳар икки ташаббус йирик автокомпаниялар томонидан қўллаб-қувватланмаган.

2015 йилда америкалик юристлар аксарият машҳур авто ишлаб чиқарувчиларга нисбатан гуруҳ бўлиб даъво аризаси киритишган. Улар симсиз калит автомобилдан узоқда бўлса тугмали автомобиллар двигатели ўзи ўчишини талаб қилишган. 2016 йил сентябрида суд даъво аризасини қаноатлантирмаган.