“Ўзсаноатқурилишбанк” Германиянинг KfW IPEX-Bank’и билан 100 миллион евролик банклараро кредит битимини имзолади

Жорий йилнинг 15 май куни “Ўзсаноатқурилишбанк” АТБ Германиянинг KfW IPEX-Bankи билан 100 миллион евролик банклараро кредит битимини имзолади.

Битим тадбиркорлик субъектларини,  уларнинг янги иш ўринларини яратиш бўйича саъй-ҳаракатларини қўллаб-қувватлашга ҳамда Европа мамлакатларидан юқори технологик ускуналар, товарлар ва хизматлар импортини молиялаштиришга хизмат қилади. Мазкур битим доирасидаги лойиҳалар Euler Hermes, SERV, SACE сингари экспорт кредит агентликлари кафолати асосида 10 йил муддатгача молиялаштирилади.

Эътиборлиси, мазкур кредит линияси давлат кафолатини тақдим этиш борасидаги механизмсиз жалб қилинган.

KfW IPEX-Bank Германиянинг KfW Group банклари гуруҳи аъзоси сифатида Германия давлати ва унинг ташқарисида экспортни ва лойиҳаларни молиялаштириш билан шуғулланади.

Охирги 10 йилда  KfW IPEX-Bank 3 мингдан ортиқ лойиҳаларни молиялаштирган ва ушбу банк томонидан тақдим қилинган кредитлар миқдори 143 миллиард евродан ортиқни ташкил қилган.

Таъкидлаш жоизки, “Ўзсаноатқурилишбанк” АТБ Германиянинг Commerzbank AG, Landesbank Baden-Württemberg ва бошқа молия ташкилотлари билан фаол ҳамкорлик алоқаларини ўрнатган ҳамда ушбу ҳамкорларнинг кредит линияларини иқтисодиётимизнинг нефть ва газ, кимё, автомобилсозлик саноати корхоналарини ва кичик бизнес субъектларининг турли инвестицион лойиҳаларини молиялаштиришга йўналтириб келмоқда.